ტრამპმა განაცხადა, რომ არ ეთანხმება მოსაზრებას, თითქოს ირანს საერთოდ არ უნდა ჰქონდეს ბალისტიკური რაკეტები

აშშ-ის პრეზიდენტმა, დონალდ ტრამპმა განაცხადა, რომ მხარს უჭერს ირანის მიერ „გარკვეული“ რაოდენობის ჩვეულებრივი ბალისტიკური რაკეტების ქონას. მისივე თქმით, ეს არის ერთ-ერთი საკითხი, რომლის მოგვარებაშიც სპარსეთის ყურის არაბული ქვეყნები მიიღებენ მონაწილეობას.

„ჩვენ ყურის ქვეყნებთან ერთად პარალელურ რეჟიმში ვიმუშავებთ არაბირთვული საკითხების მოსაგვარებლად, როგორიცაა ჩვეულებრივი ბალისტიკური რაკეტები, რაზეც ვისაუბრებთ და რასაც მხარს დავუჭერთ. ვგულისხმობ, რომ მათ უნდა ჰქონდეთ გარკვეული რაოდენობა, რადგან სხვებსაც აქვთ. რაღაც რაოდენობა უნდა გქონდეს“, - განაცხადა ტრამპმა საფრანგეთში, „დიდი შვიდეულის“ სამიტზე გამართულ პრესკონფერენციაზე.

ტრამპმა აღნიშნა, რომ არ ეთანხმება მოსაზრებას, თითქოს ირანს საერთოდ არ უნდა ჰქონდეს ბალისტიკური რაკეტები, იმის გათვალისწინებით, რომ საუდის არაბეთსა და სხვა ქვეყნებს ისინი გააჩნიათ.

„რაკეტები პრობლემა არ არის. რაკეტები მხოლოდ ერთ პატარა ადგილს აზიანებს, ისინი პლანეტას არ აფეთქებენ. ასე რომ, ყურის ქვეყნები არაბირთვულ საკითხებს მიხედავენ“, - თქვა ტრამპმა. „ჩვენ ვისაუბრებთ ბალისტიკურ რაკეტებზე, ასევე ვისაუბრებთ მათ ტერორისტულ პროქსი-ჯგუფებზე - ჩვენ არ გვინდა, რომ ეს ხდებოდეს“.