ცისტური ფიბროზის მქონე ბავშვის მშობელი სახელმწიფოს მიერ ინოვაციური პრეპარატის დაფინანსებაზე: ეს ჩვენი შვილების ხელახალი დაბადებაა“

ეს არის ჩვენთვის ჩვენი შვილების ხელახალი დაბადება. ეს მედიკამენტი ძალიან დიდ ზეგავლენას ახდენს ბავშვების ხარისხიან ცხოვრებაზე. დღეს, ესე უცებ არ ველოდით, იმედი გქონდა, მოლოდინიც, მაგრამ დღეს არ ველოდით და აი გაოგნებული ვარ, - აცხადებს ცისტური ფიბროზის დიაგნოზის მქონე ბავშვის მშობელი გვანცა ჭიღლაძე. მისი თქმით, სახელმწიფოს გადაწყვეტილება „ტრიკაფტას“ შეძენის შესახებ ცისტური ფიბროზის მქონე ბავშვებისთვის ჯანმრთელობის, მომავლისა და ცხოვრების ხარისხის გაუმჯობესების მნიშვნელოვანი წინაპირობაა.

„ეს ძალიან მნიშვნელოვანია ჩვენი შვილებისთვის, მათი მომავლისთვის, ჯანმრთელობისთვის, გადარჩენისთვის, ხარისხიანი სიცოცხლისთვის. იმედი მაქვს, რომ ამის შემდეგ ყველაფერი ძალიან კარგად იქნება“, - ამბობს გვანცა ჭიღლაძე.

ცისტური ფიბროზის მქონე კიდევ ერთი ბავშვის მშობლის, გოგა ბერიძის განცხადებით, „ტრიკაფტას“ ხელმისაწვდომობა მშობლების, ექიმებისა და სახელმწიფოს თანამშრომლობის შედეგია.

„ძალიან ბედნიერები ვართ, რომ ჩვენი შვილებისთვის, მათი სიცოცხლისთვის ყველაზე მნიშვნელოვანი მედიკამენტი გვექნება. ეს არის სიცოცხლის გადამრჩენი მედიკამენტი, რომელიც ამ დაავადების მქონე ადამიანებისთვის ერთ-ერთი მთავარი პრეპარატია. ამიტომ ის სასიცოცხლოდ მნიშვნელოვანი იყო ყველა იმ პაციენტისთვის, ვისთვისაც ეს მედიკამენტი განკუთვნილია“, - აღნიშნა გოგა ბერიძემ.