ტუსკმა განმარტა, რატომ არ აპირებს პოლონეთი უკრაინისთვის Patriot-ის რაკეტები გადაცემას

პოლონეთი ამ ეტაპზე არ აპირებს უკრაინას Patriot-ის დამატებითი რაკეტები გადასცეს. შესაბამისი განცხადება ქვეყნის პრემიერ-მინისტრმა, დონალდ ტუსკმა პარიზში „მსურველთა კოალიციის“ ლიდერების შეხვედრის შემდეგ გააკეთა.

ტუსკმა აღნიშნა, რომ პოლონეთს ამ რაკეტების „დიდი მარაგები არ გააჩნია“.

„თქვენ ასევე შენიშნეთ ხმაური, რომელიც გამოიწვია ჩვენმა გადაწყვეტილებამ Patriot-ის ხუთი რაკეტის გადაცემის შესახებ, რაც სრულად იყო შეთანხმებული ნატოსთან და ამერიკელებთან... ამჟამად ჩვენ მსგავსი დახმარების გაწევას არ ვგეგმავთ“, - განაცხადა მან.

ამასთან, ტუსკმა ხაზგასმით აღნიშნა, რომ სანამ ის პრემიერ-მინისტრის თანამდებობაზე რჩება, პოლონეთი აქტიურად დაეხმარება უკრაინის რუსეთთან ბრძოლაში. კითხვაზე, თუ რატომ არ შეუერთდა პოლონეთი ევროპული ქვეყნების ანტიბალისტიკურ კოალიციას უკრაინასთან ერთად, ტუსკმა უპასუხა, რომ პოლონური კომპანიები ამ ეტაპზე საკუთარ შესაძლებლობებს აფასებენ.

„კოალიცია ღიაა; თუ პოლონური კომპანიების მხრიდან იქნება მზა ინდუსტრიული წინადადება, ჩვენ შევუერთდებით ამ კოალიციას“, - განაცხადა პრემიერ-მინისტრმა.

მან ასევე აღნიშნა, რომ ომის მალე დასრულებას არ ელოდება და ესკალაცია მინიმუმ ზამთრამდე გაგრძელდება.