უკრაინამ კრასნოდარის მხარეში ილსკის ნავთობგადამამუშავებელ ქარხანას დაარტყა

უკრაინულმა ძალებმა გვიან ღამით რუსეთის სანავთობო ინფრასტრუქტურაზე მორიგი შეტევა განახორციელეს. ინფორმაციას უკრაინული მედია ავრცელებს.

მედიის ინფორმაციით, ამჯერად დარტყმის სამიზნე კრასნოდარის მხარეში მდებარე ილსკის ნავთობგადამამუშავებელი ქარხანა გახდა.

სოციალურ ქსელებში გავრცელებულ ფოტოებსა და ვიდეოებში, რომლებიც ადგილობრივებმა გადაიღეს, ქარხნის ტერიტორიაზე ძლიერი ხანძარია ასახული.

ილსკის ნავთობგადამამუშავებელი ქარხანა, რომელიც უკრაინის მიერ კონტროლირებადი ტერიტორიიდან დაახლოებით 500 კილომეტრში მდებარეობს, სამხრეთ რუსეთის ერთ-ერთი უმსხვილესი საწარმოა. მისი წლიური წარმადობა დაახლოებით 6,6 მილიონ ტონა საწვავს შეადგენს.

გავრცელებული ინფორმაციით, ეს უკრაინის მხრიდან აღნიშნულ ობიექტზე განხორციელებული სულ მცირე მე-17 შეტევაა. ბოლოს ქარხანა 2 ივნისს გახდა დარტყმის სამიზნე.