უკრაინამ მოსკოვს დრონებით შეუტია

უკრაინის შეიარაღებული ძალების მასშტაბური შეტევა მოსკოვზე - უპილოტო საფრენი აპარატების ნამსხვრევები შერემეტიევოს აეროპორტის ტერიტორიაზე დაეცა. „ნამსხვრევები მგზავრთა მომსახურებისა და საჰაერო ხომალდების ზონებიდან უსაფრთხო მანძილზეა. ადგილზე მუშაობენ ოპერატიული სამსახურები, უსაფრთხოების ყველა საჭირო ზომა უზრუნველყოფილია“, - ნათქვამია მოსკოვის აეროპორტის პრესსამსახურის განცხადებაში.

მოსკოვის მერმა, სერგეი სობიანინმა განაცხადა, რომ ღამის განმავლობაში საჰაერო თავდაცვის ძალებმა გაანადგურეს მინიმუმ 85 დრონი, რომლებიც რუსეთის დედაქალაქისკენ მიფრინავდნენ. მისივე თქმით, შეტევის შედეგად დაზიანდა კაპოტნიაში მდებარე მოსკოვის ნავთობგადამამუშავებელი ქარხანა - დაშავდა 12 ადამიანი, თუმცა ქარხანაში საწარმოო პროცესი არ შეფერხებულა. ასევე, მედია წერს ხანძრის შესახებ სოლნეჩნოგორსკის ნავთობბაზაზე, მოსკოვის ოლქის სოფელ დურიკინოსთან.

გარდა ამისა, სობიანინმა დაადასტურა, რომ დრონების თავდასხმის შედეგად დაზიანდა 3 საცხოვრებელი სახლი. სოციალური ქსელის მომხმარებლები ავრცელებენ ვიდეოს, სადაც ჩანს დრონის მოხვედრა მრავალსართულიან კორპუსზე მიხაილოვის ქუჩაზე. Telegram-არხი Astra იტყობინება მრავალბინიანი სახლის დაზიანების შესახებ ზელენოგრადში და ხანძრის შესახებ ტექნოპარკ „ელმას“ ტერიტორიაზე.

თავის მხრივ, რუსეთის ჯარებმა კვლავ მიიტანეს დარტყმები უკრაინის რეგიონებზე. დაბომბვების შესახებ ინფორმაციას ავრცელებენ ხარკოვის, ზაპოროჟიეს, დნეპროპეტროვსკისა და ოდესის ოლქების ხელისუფლება. დრონები შენიშნეს პოლტავისა და სუმის ოლქების თავზეც. არიან დაშავებულები, თუმცა, წინასწარი მონაცემებით, მსხვერპლი არ არის.