უკრაინის პრეზიდენტის ოფისის ხელმძღვანელი: უკრაინაში საომარი მოქმედებების რაც შეიძლება მალე დასრულება პრეზიდენტის პირდაპირი ბრძანებაა, ხოლო კონფლიქტის ზამთრამდე დასრულება სრულიად რეალისტური მიზანია

უკრაინაში საომარი მოქმედებების რაც შეიძლება მალე დასრულება პრეზიდენტის პირდაპირი ბრძანებაა, ხოლო კონფლიქტის ზამთრამდე დასრულება სრულიად რეალისტური მიზანია. ამის შესახებ უკრაინის პრეზიდენტის ოფისის ხელმძღვანელმა, კირილო ბუდანოვმა საერთაშორისო ფორუმზე „უსაფრთხოების არქიტექტურა“ განაცხადა.

„ვადასტურებ, რომ ეს ნამდვილად მისი ძალისხმევაა - შეაჩეროს საომარი მოქმედებები რაც შეიძლება მალე, სასურველია ზამთრამდე. მე კი, როგორც პრეზიდენტის ოფისის ხელმძღვანელი, აუცილებლად გავაკეთებ ყველაფერს პრეზიდენტის მიერ დასახული მიზნის მისაღწევად. ჩემი აზრით, ეს აბსოლუტურად სწორი, დროული და კარგად გააზრებული ნაბიჯია“, - აღნიშნა ბუდანოვმა.

ჟურნალისტების კითხვაზე, თუ რამდენად რეალურია დასახული ამოცანა, ბუდანოვმა მოკლედ უპასუხა: „რეალისტურია“.

ბუდანოვის განცხადებით, უკრაინას გააჩნია საკმარისი შესაძლებლობები იმისათვის, რომ აღნიშნული გეგმის პრაქტიკაში განხორციელება სცადოს.

მან ასევე დასძინა, რომ მიუხედავად იმისა, რომ რუსეთმა შესაძლოა უარი თქვას ამ პირობებზე, ამჟამად უკვე არსებობს რეალური ნიშნები იმისა, რომ საომარი მოქმედებების შეწყვეტისთვის საჭირო ნიადაგი მომზადებულია.