უკრაინული მედია: კიევის ოლქში, პოლიგონზე რუსეთის დარტყმის შედეგად 10 ადამიანი დაიღუპა და 100-მდე დაშავდა

24 ივლისს, დღისით, რუსულმა ძალებმა კიევის ოლქში მდებარე პოლიგონზე სარაკეტო დარტყმა განახორციელეს. თავდასხმას, სადაც იმ დროისთვის შეიარაღების გამოფენა მიმდინარეობდა, ბოლო მონაცემებით, 10 ადამიანი ემსხვერპლა, ხოლო 100-მდე პირმა სხვადასხვა სიმძიმის დაზიანება მიიღო. ინფორმაციას უკრაინის გენერალური პროკურორი, რუსლან კრავჩენკო Telegram-ის პირად არხზე ავრცელებს.

გენერალური პროკურორის თქმით, რუსეთმა მორიგი სარაკეტო დარტყმა მიაყენა კიევის ოლქს, რასაც მსხვერპლი და დიდი რაოდენობით დაშავებულები მოჰყვა, ხოლო ზუსტი მონაცემები ამ დრომდე ზუსტდება.

მომხდარ ფაქტზე გამოძიება ორი მიმართულებით დაიწყო. პირველი ეხება ომის კანონებისა და ჩვეულებების დარღვევას, ხოლო მეორე - სამსახურებრივი მოვალეობის არაჯეროვან შესრულებას, რაც უკავშირდება ღონისძიების ორგანიზებასა და ჩატარებაზე პასუხისმგებელ პირთა შესაძლო გულგრილობას, რამაც ადამიანების დაღუპვა და სხვა მძიმე შედეგები გამოიწვია.

რუსლან კრავჩენკომ ხაზგასმით აღნიშნა, რომ გამოძიება დაადგენს, ვინ მიიღო ღონისძიების ჩატარების გადაწყვეტილება, ვინ შეათანხმა ადგილი, დრო და ფორმატი, უსაფრთხოების რა ზომები იყო გათვალისწინებული და იყო თუ არა ჯეროვნად შეფასებული რისკები.

თავდაპირველად გავრცელებული ინფორმაციით, რუსული სარაკეტო დარტყმის შედეგად 6 დაღუპულისა და ათობით დაშავებულის შესახებ იუწყებოდნენ, თუმცა მოგვიანებით მსხვერპლთა და დაზარალებულთა რაოდენობა გაიზარდა.