რა განცხადებები გაკეთდა კიევში ტრამპის წარმომადგენლებთან შეხვედრის შემდეგ?

უკრაინასა და რუსეთს შორის მოლაპარაკებების განახლება შესაძლებელია, თუმცა ძირითადი საკითხები, მათ შორის ტერიტორიული საკითხები, მხოლოდ ლიდერების დონეზე შეიძლება გადაწყდეს, - ამის შესახებ უკრაინის პრეზიდენტმა ვოლოდიმირ ზელენსკიმ აშშ-ის პრეზიდენტის სპეციალურ წარმომადგენლებთან, სტივ უიტკოფთან და ჯარედ კუშნერთან ერთობლივ პრესკონფერენციაზე განაცხადა, რომელიც მათ შეხვედრის შემდეგ გამართეს

ზელენსკიმ აღნიშნა, რომ აშშ-ის პრეზიდენტის სპეციალურ წარმომადგენლებთან შეხვედრისას ომის დასრულებისა და რუსეთთან მოლაპარაკებების განახლების შესაძლებლობა განიხილეს.

„როგორც გახსოვთ, სამმხრივი შეხვედრა გვქონდა და ამ შეხვედრაზე ეროვნული უსაფრთხოების მრჩევლებიც მონაწილეობდნენ. ვფიქრობ, ყველა მხარე ყველაფერს გააკეთებს ამ მოლაპარაკებების განახლებისთვის“, - თქვა პრეზიდენტმა.

ზელენსკიმ ხაზგასმით აღნიშნა, რომ ტერიტორიული საკითხი კვლავ აქტუალურია. მისი თქმით, ასეთი საკითხების მოგვარება მხოლოდ ლიდერების დონეზეა შესაძლებელი.

„მთავარი ის არის, რომ დღეს ჩვენ გვაქვს შესაძლებლობა განვიხილოთ ყველაფერი: უსაფრთხოების გარანტიები და ჩვენ ნამდვილად ვსაუბრობთ უკრაინის მომავალზე. და ჩვენ ყველას გვსურს - აქ სოლიდარობა გვაქვს - ყველას გვსურს ომის რაც შეიძლება მალე დასრულება“, - დასძინა პრეზიდენტმა.

ზელენსკიმ აღნიშნა, რომ მან და ამერიკულმა გუნდმა ასევე განიხილეს „უკრაინის კეთილდღეობის გეგმა“. მან ხაზგასმით აღნიშნა, რომ უკრაინისთვის მნიშვნელოვანია არა მხოლოდ ომის დასრულება, არამედ უსაფრთხოებისა და ეკონომიკური გარანტიების მიღება.

„ჩვენ ყველას გვესმის ის გამოწვევები, რომლებიც ომის დასრულების შემდეგ გველოდება. ჩვენ მათ განვიხილავთ. ჩვენ გვესმის, რომ ჩვენი არმია ძლიერი უნდა იყოს და ეს არის ჩვენი მთავარი უსაფრთხოების გარანტია, ეს ყველაფერი კი მოითხოვს რესურსებს...“, - თქვა პრეზიდენტმა.

რაც შეეხება ტრამპის წარმომადგენლებს, როგორც ჯარედ კუშნერმა განაცხადა, სანამ სამშვიდობო შეთანხმების პირობები არ იქნება შეთანხმებული და თავად დოკუმენტი არ იქნება ხელმოწერილი, ნაადრევია იმაზე საუბარი, თუ როდის დამყარდება მშვიდობა. კუშნერს ჰკითხეს, თვლიდა თუ არა, რომ ომი ზამთრამდე შეიძლება დასრულებულიყო და მზად იყო თუ არა ამისთვის ვლადიმერ პუტინი.

„პასუხი ასეთია: არასდროს იცი, რა მოხდება ნებისმიერი შეთანხმების შემთხვევაში, არა? ეს არ მოხდება მანამ, სანამ არ დასრულდება. ეს შეიძლება სწრაფად მოხდეს, ან შეიძლება ნელა მოხდეს, მაგრამ ეს არ მოხდება, თუ არ ჩატარდება ეს შეხვედრები და ეს დისკუსიები“, - აღნიშნა კუშნერმა.ამავდროულად, მან დასძინა, რომ კულისებში ბევრი სამუშაო მიმდინარეობს ამისთვის შესაფერისი პირობების შესაქმნელად.

„ეს ძალიან რთული საკითხია, მაგრამ ჩვენ ვეცდებით. და მე ვფიქრობ, რომ თუ წარმატებას მივაღწევთ, ეს წარმოუდგენელი მიღწევა იქნება. ეს არ ნიშნავს, რომ ჩვენ ამას მივაღწევთ, მაგრამ ეს არის ძალისხმევა, რომლის განხორციელებაც ძალიან მნიშვნელოვანია. ამიტომ ჩვენ გავაგრძელებთ ამის გაკეთებას“, - აღნიშნა კუშნერმა.

ცნობისთვის, ტრამპის წარმომადგენლები ჯარედ კუშნერი და სტივ უიტკოფი კიევში მოსკოვიდან დღეს ჩავიდნენ. მანამდე მათ გუშინ 3-საათიანი შეხვედრა ვლადიმერ პუტინთან ჰქონდათ.