უკრაინული მედია: ყოფილ უკრაინელ დიპლომატს დონორების მიერ რუსეთის სრულმასშტაბიანი შეჭრის შემდეგ უკრაინის მხარდასაჭერად გადარიცხული 1.28 მილიონი დოლარის მითვისების საქმეზე ბრალი წაუყენეს

უკრაინის ეროვნული ანტიკორუფციული ბიუროს (NABU) ინფორმაციით, საგარეო საქმეთა სამინისტროს ყოფილ მაღალჩინოსანს უკრაინის მხარდასაჭერად უცხოელი დონორების მიერ გადარიცხული 37 მილიონი გრივნის (1.28 მილიონი დოლარი) მითვისებაში ბრალი წაუყენეს. ინფორმაციას უკრაინული მედია ავრცელებს.

NABU-ის ცნობით, თანხები ბრალდებულმა და მისმა სავარაუდო თანამზრახველებმა შემდგომ გაათეთრეს.

ბიუროს ინფორმაციით, ბრალი წარედგინა ოლექსანდრ ბანკოვს, რომელიც 2020-2024 წლებში უკრაინის საგარეო საქმეთა სამინისტროს სახელმწიფო მდივნის თანამდებობას იკავებდა, ასევე, მისი ყოფილი აპარატის ხელმძღვანელს, რომელიც ამჟამად დიპლომატიურ სამსახურში მუშაობს.

საქმეზე ბრალდებულებს შორის არიან ასევე საგარეო საქმეთა ყოფილი მინისტრის თანაშემწე, არასამთავრობო ორგანიზაციის ხელმძღვანელი და ამავე ორგანიზაციის ბუღალტერი.

„ჯგუფის წევრებმა მიითვისეს უცხოელი მოქალაქეებისა და სხვა დონორების მიერ რუსეთის სრულმასშტაბიანი შეჭრის დაწყების შემდეგ უკრაინის მხარდასაჭერად გადარიცხული თანხები და ისინი ვალუტის კონვერტაციის ცენტრების მეშვეობით გაათეთრეს“, - ნათქვამია NABU-ის განცხადებაში.

გამოძიების ვერსიით, საგარეო საქმეთა სამინისტროს სახელმწიფო მდივანმა საერთაშორისო დონორები და უკრაინის უცხოურ დიპლომატიურ წარმომადგენლობებში დასაქმებული თანამშრომლები დაარწმუნა, ფინანსური დახმარება მის კონტროლქვეშ მყოფი არასამთავრობო ორგანიზაციის საბანკო ანგარიშზე გადაერიცხათ.

NABU-ის განცხადებით, არასამთავრობო ორგანიზაციის მიერ მიღებული თანხები სამართლებრივად უკრაინის საგარეო საქმეთა სამინისტროს სპეციალური ფონდის მიზნობრივ საბიუჯეტო სახსრებს წარმოადგენდა.

„შემდეგ ეს თანხები გადაირიცხა ჯგუფის მიერ კონტროლირებადი ინდივიდუალური მეწარმეებისა და კომპანიების ანგარიშებზე, საიდანაც ფულის გათეთრების ცენტრების მეშვეობით გაანაღდეს. სქემის მონაწილეები გათეთრებულ თანხებს პირადი გამდიდრებისთვის იყენებდნენ“, – აცხადებს ბიურო.

უკრაინის საგარეო საქმეთა სამინისტროში განაცხადეს, რომ უწყებას „ყოველთვის ჰქონდა და ახლაც აქვს ნულოვანი ტოლერანტობა ნებისმიერი უკანონო ქმედების, განსაკუთრებით კი კორუფციული დანაშაულების მიმართ“.

„სამინისტროს არასოდეს უცდია ეჭვმიტანილების დაცვა. NABU-ის მიერ დღეს გავრცელებული ინფორმაცია ნაწილობრივ თავად სამინისტროს შიდა აუდიტისა და სამართალდამცავ ორგანოებთან თანამშრომლობის შედეგიც არის“, - აცხადებენ საგარეო უწყებაში.