უკრაინამ სარატოვში Rosneft-ის ქარხანა და Ozon-ის საწყობი დრონებით დაბომბა

11 სექტემბრის გამთენიისას, რუსეთის ქალაქ სარატოვში ნავთობისა და ლოგისტიკურ ინფრასტრუქტურას უკრაინული უპილოტო საფრენი აპარატები დაესხნენ თავს. არსებული ინფორმაციით, იერიშის შედეგად Rosneft-ის კუთვნილ ნავთობგადასამუშავებელ ქარხანასა და ონლაინრითეილერ Ozon-ის ლოგისტიკურ ცენტრში ხანძარი გაჩნდა.

დამოუკიდებელმა რუსულმა გამოცემა ASTRA-მ ღია წყაროების მონაცემთა ანალიზით Rosneft-ის ობიექტზე გაჩენილი ცეცხლის ფაქტი დაადასტურა. რაც შეეხება Ozon-ს, პლატფორმა Exilenova+-ის მიერ გავრცელებულ ვიდეომასალაში ჩანს კომპანიის ლოგისტიკური ჰაბი, სადაც ძლიერი ხანძარია გაჩენილი და აფეთქებების კვალი ფიქსირდება.

საყურადღებოა, რომ უკრაინის თავდაცვის სამინისტროს მომხდარზე ოფიციალური კომენტარი ჯერ არ გაუვრცელებია. შესაბამისად, მიყენებული ზარალის ზუსტი მასშტაბის დამოუკიდებლად გადამოწმება ამ ეტაპზე ვერ ხერხდება.

ცნობისთვის, Rosneft-ის შემადგენლობაში შემავალი სარატოვის ნავთობგადასამუშავებელი ქარხანა წელიწადში დაახლოებით 4.8 მილიონ ტონა ნედლ ნავთობს ამუშავებს. თავად ქალაქი სარატოვი კი უკრაინის საზღვრიდან დაახლოებით 460 კილომეტრის დაშორებით მდებარეობს.