უკრაინული მედია: უკრაინის ეროვნული ანტიკორუფციული ბიურო შესაძლოა მუშაობდეს საქმეზე, რომელიც დავით არახამიას ეჭვმიტანილად ცნობას ითვალისწინებს
უკრაინის ეროვნული ანტიკორუფციული ბიურო (NABU), შესაძლოა, მუშაობდეს საქმეზე, რომელიც ქვეყნის უმაღლეს რადაში მმართველი ფრაქციის „ხალხის მსახურის“ ლიდერის დავით არახამიას ეჭვმიტანილად ცნობას ითვალისწინებს. ინფორმაციას გამოცემა censor.net ავრცელებს.
გამოცემა აღნიშნავს, რომ საქმე, სავარაუდოდ, პარლამენტის დეპუტატებს შორის კორუფციას უკავშირდება.
როგორც გამოცემა წერს, ივლისის შუა რიცხვებში ანტიკორუფციულმა ბიურომ და სპეციალურმა ანტიკორუფციულმა პროკურატურამ მიიღეს დადგენილება არახამიას თანაშემწის ბიოლოგიური ნიმუშის ასაღებად.
ეს საგამოძიებო მოქმედება შესაძლებელია უკავშირდებოდეს საქმეს, რომელიც რადის დეპუტატებისთვის ხელფასების კონვერტებით დარიგებას ეხება.
ცნობილია, რომ ფრაქციის ლიდერის თანაშემწე ამ საქმესთან დაკავშირებით დეკემბერში უკვე გაჩხრიკეს. წყაროების ცნობით, არახამიას საქმე უახლოეს თვეებში იმავე სცენარით განვითარდება, როგორც ეს უკრაინის პრეზიდენტის ოფისის ხელმძღვანელ ანდრეი ერმაკთან მიმართებით მოხდა.
იმედი
წყარო: imedinews.ge