უკრაინულმა დრონებმა ბაშკორტოსტანსა და კრასნოდარის მხარეში ნავთობგადამამუშავებელ ქარხნებს დაარტყეს

უკრაინელმა სამხედროებმა ბაშკორტოსტანის ქალაქ სალავატსა და კრასნოდარის მხარის დაბა აფიპსკიში მდებარე ნავთობგადამამუშავებელ ქარხნებზე უპილოტო საფრენი აპარატებით იერიში მიიტანეს.

სალავატში დარტყმის ქვეშ მოჰყვა რუსეთის ერთ-ერთი უმსხვილესი ნავთობგადამამუშავებელი კომპლექსი - „გაზპრომ ნეფტეხიმ სალავატი“. მედიის ცნობით, ქარხანაში ხანძარი გაჩნდა. ასევე, წინასწარი მონაცემებით, სალავატში ცეცხლი გაუჩნდა ნავთობბაზა „როსნეფტ-ოპტს“.

ბაშკორტოსტანის ხელმძღვანელმა, რადი ჰაბიროვმა რესპუბლიკაზე დრონების თავდასხმა დაადასტურა. „არსებობს დაკვამლიანების რამდენიმე კერა“, - დაწერა მან Telegram-არხზე და დასძინა, რომ არავინ დაშავებულა.

კრასნოდარის მხარეში, დრონების თავდასხმის შედეგად, ხანძარი აფიპსკის ნავთობგადამამუშავებელ ქარხანაში გაჩნდა. რეგიონის ოპერატიულმა შტაბმა ასევე განაცხადა „ნამსხვრევების ჩამოვარდნის შესახებ. დაზიანდა რამდენიმე საცხოვრებელი სახლის სახურავები და ფასადები, დაშავდა ერთი ადამიანი.

დრონების დარტყმების გამო, რუსული ნავთობგადამამუშავებელი ქარხნები იძულებულნი არიან, დროებით შეაჩერონ ან სრულად შეწყვიტონ მუშაობა.