ვენსი: ის, რის გაკეთებასაც ვცდილობთ და რისკენაც ჩვენი საგარეო პოლიტიკაა მიმართული, ევროპის დამოუკიდებლობისა და სუვერენიტეტის ხელშეწყობაა
აშშ-ის ვიცე-პრეზიდენტმა ჯეი დი ვენსმა თეთრ სახლში გამართულ ბრიფინგზე ამერიკის საგარეო პოლიტიკის პრიორიტეტებსა და ევროპის უსაფრთხოების არქიტექტურაზე ისაუბრა.
„გულახდილად რომ ვთქვათ, არ არსებობს პრეზიდენტი, რომელმაც იმაზე მეტი გააკეთა უკრაინის გადასარჩენად, ვიდრე დონალდ ტრამპმა. როგორც მან თავისი ცნობილი სიტყვებით თქვა: „ობამამ მათ ზეწრები მისცა, მე კი - Javelin-ები“. სწორედ ამ Javelin-ებმა უზრუნველყვეს ის, რომ უკრაინა დღესაც ინარჩუნებს თავის ტერიტორიულ სუვერენიტეტს.
მან ასევე თქვა, რომ სურს აწარმოოს ისეთი ამერიკული პოლიტიკა, რომელიც ორიენტირებული იქნება ამერიკის შეერთებული შტატების ინტერესებზე. ამ საგარეო პოლიტიკის ნაწილი კი არ არის პუტინის დაჯილდოება ან ისეთი ქვეყნის დასჯა, როგორიც პოლონეთია, რომელიც ჩვენ ძალიან გვიყვარს. ჩვენ გვიყვარს პოლონეთი, გვიყვარს პოლონელი ხალხი. ის, რის გაკეთებასაც ვცდილობთ და რისკენაც ჩვენი საგარეო პოლიტიკაა მიმართული, ევროპის დამოუკიდებლობისა და სუვერენიტეტის ხელშეწყობაა.
ჩვენ გვსურს, რომ ევროპამ მეტი პასუხისმგებლობა აიღოს საკუთარ ტერიტორიულ მთლიანობაზე. გვინდა, რომ ევროპამ გაცილებით აქტიური ნაბიჯები გადადგას. ახლა, მგონი, თქვენ ახსენეთ 4 000 ჯარისკაცი. ჩვენ პოლონეთში ჯარების რაოდენობა 4 000-ით არ შეგვიმცირებია. რაც ჩვენ გავაკეთეთ, არის ის, რომ გადავავადეთ ჯარების განლაგება, რომელიც პოლონეთში უნდა გაგზავნილიყო. ეს არ არის შემცირება, ეს უბრალოდ როტაციის სტანდარტული შეფერხებაა, რაც ხანდახან ხდება ხოლმე მსგავს სიტუაციებში.
მაგრამ, აი სად არის ფუნდამენტური პრობლემა: პოლონეთს შესწევს ძალა, დაიცვას თავი ამერიკის შეერთებული შტატების დიდი მხარდაჭერით. ჩვენ არ ვსაუბრობთ ევროპიდან აბსოლუტურად ყველა ამერიკელი ჯარისკაცის გამოყვანაზე. ჩვენ ვსაუბრობთ გარკვეული რესურსების იმგვარად გადანაწილებაზე, რაც მაქსიმალურად გაზრდის ამერიკის უსაფრთხოებას. არ ვფიქრობ, რომ ეს ევროპისთვის ცუდია. ეს პირიქით, მოუწოდებს ევროპას, მეტი პასუხისმგებლობა აიღოს საკუთარ თავზე.
