ვოლოდიმირ ზელენსკი რუმინეთს მხარდაჭერას უცხადებს და რუსეთის სამართლიანად დასჯას ითხოვს

უკრაინის პრეზიდენტი, ვოლოდიმირ ზელენსკი რუმინეთის ტერიტორიაზე რუსული დრონის ჩამოვარდნის ინციდენტს გამოეხმაურა. პრეზიდენტის განცხადებით, უკრაინა მზად არის, საჭიროების შემთხვევაში, რუმინეთს ნებისმიერი სახის დახმარება აღმოუჩინოს.

„ჩვენ მზად ვართ, მხარი დავუჭიროთ რუმინეთს ყველაფერში, რაც კი ამ ვითარებაში აუცილებელი იქნება“, - აღნიშნა უკრაინის ლიდერმა.

ზელენსკიმ ხაზგასმით აღნიშნა, რომ საერთაშორისო თანამეგობრობამ უნდა გააძლიეროს ზეწოლა მოსკოვზე, რათა თავიდან იყოს აცილებული ომის გაჭიანურება ან მისი სხვა რეგიონებში გავრცელება. მან ევროკავშირს რუსეთის წინააღმდეგ უფრო მკაცრი ზომების გატარებისკენ მოუწოდა.

„ჩვენი მოლოდინია, რომ ევროკავშირის ახალი სანქციები რუსეთის წინააღმდეგ იქნება მართლაც ძლიერი. რუსეთმა უნდა იგრძნოს, რომ მის ყოველ დარტყმას თავად აგრესორისთვის მოაქვს მნიშვნელოვანი დანაკარგი - ეს იქნება სამართლიანი“, - განაცხადა ზელენსკიმ.

უკრაინის პრეზიდენტის თქმით, გასულ ღამით რუსულმა ძალებმა მიზანმიმართული იერიში მიიტანეს ქვეყნის სამხრეთ ნაწილზე - ოდესის რეგიონზე, რომელიც უშუალოდ ესაზღვრება რუმინეთს. მისივე შეფასებით, ეს იყო კიდევ ერთი ცინიკური თავდასხმა სამოქალაქო ინფრასტრუქტურასა და საზღვაო აკვატორიაში მყოფ სამოქალაქო საკონტეინერო გემებზე.