ვოლსკი ეკლესიის კრიტიკაზე: ეკლესიის შიგნიდან თუ გარედან შერყევა არის ამოცანა, რათა სახელმწიფო დასუსტდეს, დასუსტებულ სახელმწიფოში კი საკუთარი ინტერესების გატარება ადვილია. ასე, რომ მოვუფრთხილდეთ ჩვენს ეკლესიას

არსებობს საერო სივრცე, სადაც ეკლესია ყოველთვის თავის სიტყვას იძახის. ეროვნული თვითმყოფადობა თუ გააჩნია საქართველოს, ამაში ეკლესიის დამსახურება და ლომის წილი ძალიან დიდია, - განაცხადა პარლამენტის პირველმა ვიცე-სპიკერმა, გიორგი ვოლსკიმ გადაცემაში „დღის ქრონიკა“.

მისივე თქმით, ეკლესიის მიმართ დამოკიდებულება საკმაოდ კრიტიკულია საზოგადოების გარკვეულ ჯგუფში.

„შეიძლება საეკლესიო იერარქების ან სამღვდელოების ცალკეული პირების მიმართ ვიღაცას პრეტენზია ჰქონდეს. ეკლესიაში მოღვაწეობენ ჩვენნაირი ადამიანები და მათ კიდევ უფრო მეტი პასუხისმგებლობა აქვთ უფლის წინაშე, ამიტომ კრიტიკაც მისაღები უნდა იყოს, მაგრამ ეს გამოწვეული კრიტიკა იმით, რომ ვიღაცას პოლიტიკური, ბოროტი გეგმა გააჩნია, რასაკვირველია უნდა ვამხილოთ.

ყველას უნდა გვახსოვდეს, რომ ეკლესიაზე დგას საქართველოს არა მარტო თვითმყოფადობა, არამედ სტაბილურობაც. მთავარი არის საზოგადოების ის უშველებელი ნაწილი, რომელიც ილია მეორესთან გამოთხოვებისას თბილისის ქუჩებში იდგა, ამას უნდა გაუწიო ანგარიში, ეს ერთი და მეორე, როდესაც საუბარია პოლიტიკურ მიზანზე, მზაკვრობა იმდენად აშკარაა და იმდენად თვალსაჩინოა, რომ ხანდახან გზარავს კიდეც ადამიანს, რომ ნუთუ ეს საქართველოში ხდება?! ნუთუ ამას საქართველოს მოქალაქე სჩადის?!

ეკლესიის შერყევა შიგნიდან თუ გარედან არის ამოცანა, რათა სახელმწიფო დასუსტდეს, დასუსტებულ სახელმწიფოში კი საკუთარი ინტერესების გატარება ადვილია. ასე, რომ მოვუფრთხილდეთ ჩვენს ეკლესიას და გვიყვარდეს ჩვენი ეკლესია“, - აღნიშნა გიორგი ვოლსკიმ.