ზაზა ლომინაძე: ონკოლოგიაში დღეს გვყავს 30 ათასამდე პაციენტი მაშინ, როდესაც გვაქვს უფასო სკრინინგი - ძუძუს კიბოს, პროსტატის, სწორი ნაწლავის, მაგრამ მოცვა არის 12-15%

ჯანდაცვის საპარლამენტო კომიტეტის თავმჯდომარემ ზაზა ლომინაძემ გადაცემაში „ღია ეთერი - დებატები“ ისაუბრა იმაზე, რას აკეთებს სახელმწიფო პირველადი ჯანდაცვის გასაძლიერებლად.

„არა მარტო საქართველოსთვის არის გამოწვევა პირველადი ჯანდაცვის სისტემა, არამედ მთელი მსოფლიოსთვის. 2026 წლის ბიუჯეტი აშშ-მ ვერ მიიღო სწორედ იმიტომ, რომ ვერ შეთანხმდნენ ჯანდაცვის ბიუჯეტზე. ორი ასეთი მომენტი გამოვნახეთ სამინისტროსთან ერთად. ეს არის სკრინინგით დაინტერესება პირველადი ჯანდაცვის რგოლით და ასევე ვაქცინაციით. ახლა, როდესაც აკრედიტაცია მიდის, რომელიც სექტემბრამდე გაგრძელდება, ძალიან დიდი გამოწვევაა პირველადი ჯანდაცვის რგოლის დაწესებულებისთვის - მეტ თანხას მიიღებ, ოღონდ დაგვეხმარე სკრინინგში.

ონკოლოგიაში დღეს გვყავს 30 ათასამდე პაციენტი მაშინ, როდესაც გვაქვს უფასო სკრინინგი - ძუძუს კიბოს, პროსტატის, სწორი ნაწლავის, მაგრამ მოცვა არის 12-15%. სახეზე გვაქვს პოლიფარმაცია, როდესაც დიდი მოცულობით მედიკამენტი ენიშნება ერთი და იგივე პაციენტს, ხშირად ეს რაოდენობა ცდება რვას, რაც მის ეფექტურობას აკლებს და პაციენტი, რომელიც უნდა იმართებოდეს პირველადი ჯანდაცვის რგოლით, ხშირად ვეღარ მართავს ექიმი და გადადის კერძო დაწესებულებაში“, - აღნიშნა ლომინაძემ.