ზელენსკი: ბელარუსის მხრიდან უნდა შეწყდეს ისეთი სასაზღვრო ინფრასტრუქტურის განვითარება, რომელიც შესაძლოა აგრესიისთვის იყოს გამოყენებული

ბელარუსის მხრიდან უნდა შეწყდეს ისეთი სასაზღვრო ინფრასტრუქტურის განვითარება, რომელიც შესაძლოა აგრესიისთვის იყოს გამოყენებული. ამის შესახებ უკრაინის პრეზიდენტმა, ვოლოდიმირ ზელენსკიმ უკრაინის საგარეო დაზვერვის სამსახურის ხელმძღვანელის მოვალეობის შემსრულებელთან, ოლეგ ლუგოვსკისთან საუბრის შემდეგ განაცხადა.

ტელეგრამის არხზე გამოქვეყნებულ განცხადებაში პრეზიდენტმა აღნიშნა, რომ ლუგოვსკიმ მას მოახსენა ბელარუსში რუსეთის აშკარა გავლენით მიმდინარე იმ ღონისძიებების შესახებ, რომლებიც უკრაინის წინააღმდეგ აგრესიის პოტენციური გაფართოებისთვის მომზადებას ისახავს მიზნად.

„ჩვენი სახელმწიფო საზღვრის გასწვრივ ბელარუსში სრულდება საგზაო ინფრასტრუქტურისა და საბრძოლო მასალების, ასევე საწვავ-საპოხი მასალების საცავების მშენებლობა, რომლებსაც სამხედრო დანიშნულების გარდა სხვა აზრი არ გააჩნიათ. ეს არის სასაზღვრო მიმართულებები: კობრინი - კოველი, ივანოვო - მანევიჩი, ლუნინეცი - სარნი, რეჩიცა - კოროსტენი და გომელი - ჩერნიგოვი. ჩვენ ვიცით, რომ რუსულ დოკუმენტებში ეს აღწერილია სწორედ ეგრეთ წოდებული „სპეცოპერაციის“ ამოცანების კონტექსტში“, - აღნიშნა ზელენსკიმ.