ზელენსკი: ბრძოლის ველზე ტენდენცია უცვლელია - რუსეთი ყოველთვიურად დაახლოებით 30 000 სამხედროს კარგავს
უკრაინის პრეზიდენტის, ვოლოდიმირ ზელენსკის განცხადებით, უკრაინის თავდაცვის ძალები სხვადასხვა ტიპის დრონების გამოყენებით რუსულ ჯარს სისტემატურად და წარმატებით ანეიტრალებენ.
როგორც ზელენსკიმ თავის ყოველდღიურ ვიდეომიმართვაში აღნიშნა, მხოლოდ ივლისში უკრაინელმა სამხედროებმა ბრძოლის ველზე უპილოტო საფრენი აპარატების მეშვეობით 30 272 რუსი ჯარისკაცი მოკლეს ან მძიმედ დაჭრეს.
„ეს ეხება დაღუპულებსა და კრიტიკულად დაჭრილებს და ეს არის მხოლოდ ის, რისი მკაფიო ვიდეოდადასტურებაც გვაქვს. ბრძოლის ველზე ტენდენცია უცვლელია - რუსეთი ყოველთვიურად დაახლოებით 30 000 სამხედროს კარგავს“, - განაცხადა პრეზიდენტმა.
ვოლოდიმირ ზელენსკიმ უკრაინელ სამხედროებს პირობა მისცა, რომ ქვეყნის თავდაცვისა და უსაფრთხოების ძალების ყველა დანაყოფი სამომავლოდ კიდევ უფრო მეტ დრონს მიიღებს.
იმედი
წყარო: imedinews.ge