ზელენსკი: დავალებები მივეცი ჩვენს წარმომადგენლებს, შეერთებული შტატების პრეზიდენტის გუნდს დაუკავშირდნენ და რუსეთის მიერ შემოთავაზებული მოკლევადიანი ცეცხლის შეწყვეტის შესახებ დეტალები გაარკვიონ

უკრაინის პრეზიდენტი ვოლოდიმირ ზელენსკი სოციალურ ქსელ X-ში რუსეთის პრეზიდენტის ვლადიმერ პუტინის მიერ 9 მაისს დროებითი ცეცხლის შეწყვეტის წინადადებას გამოეხმაურა და აღნიშნა, რომ მან თავის გუნდს დაავალა, დაუკავშირდეს აშშ-ის პრეზიდენტის დონალდ ტრამპის ადმინისტრაციას და რუსული მხარის პირობები გაარკვიოს.

„დავალებები მივეცი ჩვენს წარმომადგენლებს, შეერთებული შტატების პრეზიდენტის გუნდს დაუკავშირდნენ და რუსეთის მიერ შემოთავაზებული მოკლევადიანი ცეცხლის შეწყვეტის შესახებ დეტალები გაარკვიონ. უკრაინა ეძებს მშვიდობას და მიმართავს საჭირო დიპლომატიურ ძალისხმევას, რათა აღნიშნული ომი რეალურ დასასრულამდე მიიყვანოს. გავარკვევთ, თუ რაზეა საუბარი - მოსკოვში აღლუმის ჩატარებისთვის საჭირო რამდენიმესაათიანი უსაფრთხოების უზრუნველყოფაზე, თუ სხვა რამეზე. ჩვენი შეთავაზებაა ცეცხლის ხანგრძლივი შეწყვეტა, საიმედო და გარანტირებული უსაფრთხოება ადამიანებისთვის და ხანგრძლივი მშვიდობა. უკრაინა ამ მიმართულებით ნებისმიერ ღირსეულ და ეფექტიან ფორმატში მუშაობისთვის მზად არის“, - დაწერა ზელენსკიმ.

ცნობისთვის, გუშინ პუტინმა და ტრამპმა სატელეფონო საუბარი გამართეს. საუბრის შემდეგ ცნობილი გახდა, რომ პუტინმა უკრაინულ მხარეს 9 მაისს ცეცხლის დროებითი შეწყვეტა შესთავაზა. იდეა ტრამპმა მოიწონა.

I have instructed our representatives to contact the team of the President of the United States and clarify the details of Russia’s proposal for a short-term ceasefire. Ukraine seeks peace and is doing the necessary diplomatic work to bring this war to a real end. We will clarify… — Volodymyr Zelenskyy / Володимир Зеленський (@ZelenskyyUa) April 30, 2026