ზელენსკი მოსახლეობას: რუსებმა უკრაინაზე ახალი მასირებული დარტყმისთვის რაკეტები მოამზადეს, ეს შეიძლება უახლოესი 48 საათის განმავლობაში მოხდეს - გთხოვთ, გაუფრთხილდეთ თავს, ყურადღება მიაქციეთ საჰაერო განგაშის სიგნალებს

უკრაინული და უცხოური დაზვერვის მონაცემებით, უახლოესი 48 საათის განმავლობაში რუსეთი უკრაინაზე ახალ მასშტაბურ დარტყმას განახორციელებს. ამის შესახებ მოსახლეობას პრეზიდენტმა ვოლოდიმირ ზელენსკიმ აცნობა.

„რუსებმა უკრაინაზე ახალი მასირებული დარტყმისთვის რაკეტები მოამზადეს. შესაძლოა, ეს დარტყმა დღეს განხორციელდეს - წინასწარი ინფორმაციით, ეს შეიძლება უახლოესი 48 საათის განმავლობაში მოხდეს. გთხოვთ, გაუფრთხილდეთ თავს - ყურადღება მიაქციეთ საჰაერო განგაშის სიგნალებს“, - აღნიშნა პრეზიდენტმა.

ამასთან დაკავშირებით მან აღნიშნა, რომ უკრაინა პარტნიორებისგან გაგებას ელის.

„საჰაერო თავდაცვა არის ის პირველი პრიორიტეტი, რომელშიც პარტნიორებს რეალურად შეუძლიათ დახმარება. ყველა შეთანხმება ოპერატიულად უნდა განხორციელდეს. ასევე მნიშვნელოვანია, რომ საკვანძო პარტნიორ ქვეყნებში სულ უფრო მეტად იცოდნენ, თუ რა ხდება სინამდვილეში უკრაინაში, რუსულ დარტყმებზე ჩვენს მოსახლეობაზე და რუსეთის მიერ ომის გაჭიანურებაზე“, - დასძინა ზელენსკიმ.

ასევე, უკრაინის ლიდერმა გამოთქვა იმედი აშშ-ის მხრიდან შემდგომ მხარდაჭერაზე ომის შეწყვეტისა და ღირსეული მშვიდობის დამყარების საკითხში.

„იმედი მაქვს, რომ ამერიკა უკრაინასთან იქნება შემდგომშიც და ჩვენ შევძლებთ ამ ომის დასრულებას ღირსეული მშვიდობით. სწორედ ეს გვაკლია და გვჭირდება. ჩვენ ვემზადებით ამერიკის პრეზიდენტსა და მის გუნდთან შეხვედრისთვის“, - დასძინა მან.