ზელენსკი ფიქრობს, რომ რუსეთთან ომი ნოემბრისთვის დასრულდება

უკრაინის პრეზიდენტმა ვოლოდიმირ ზელენსკიმ მმართველი ფრაქციის „ხალხის მსახურის“ წევრებთან შეხვედრაზე განაცხადა, რომ რუსეთთან აქტიური ომი მიმდინარე წლის ნოემბრისთვის დასრულდება. ინფორმაციას უმაღლესი რადის დეპუტატი მმართველი პარტიიდან ოლგა ვასილევსკაია-სმაგლიუკი ავრცელებს.

„შეხვედრის დროის დიდი ნაწილი ომის ცხელი ფაზის დასრულებას დაეთმო. პრეზიდენტმა აღნიშნა, რომ უსაფრთხოების გარანტიების უზრუნველყოფის პირობებში, ომის ცხელი ფაზის დასრულება ნოემბერშია მოსალოდნელი“, - დაწერა ვასილევსკაია-სმაგლიუკმა „ტელეგრამის“ საკუთარ არხზე.

როგორც უკრაინელმა დეპუტატმა აღნიშნა, ზელენსკიმ შეხვედრაზე განაცხადა, რომ უკრაინისთვის მთავარია, რომ რუსეთს მოტყუების საშუალება არ მისცეს, რათა მან მოკლე შესვენების შემდეგ სამხედრო მოქმედებები კვლავ არ განაახლოს.