ზელენსკი: პუტინი ვერ აცნობიერებს, თუ რამდენად ახლოსაა რუსეთი კრიზისთან

მიმდინარე წლის იანვრიდან მაისამდე პერიოდში უკრაინამ რუსეთის ტერიტორიაზე 15 ნავთობგადამამუშავებელი ქარხანა დაბომბა. ამასთანავე, რუსეთის ლიდერს, ვლადიმირ პუტინს ამ თავდასხმებით გამოწვეული ზიანის რეალურ მასშტაბებს უმალავენ. ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

უკრაინის სახელმწიფოს მეთაურმა აღნიშნული ინფორმაცია საგარეო დაზვერვის სამსახურის უფროსის, ოლეგ ლუჰოვსკის მოხსენებაზე დაყრდნობით გააჟღერა, რომელიც რუსეთის ეკონომიკურ მდგომარეობას ეხებოდა.

„საკუთარი სიბრიყვის გამო რუსეთი ნამდვილი კრიზისის კედელს შეასკდება. ჩვენ დიდი ხანია ვამბობთ, რომ რუსებმა ეს ომი უნდა დაასრულონ. უკრაინამ შესთავაზა მათ რეალური მოლაპარაკებების ყველა ფორმატი, უსაფრთხოების გარანტიების ყველა ფორმატი და ღირსეული მშვიდობის ფორმატი“, - განაცხადა ზელენსკიმ.

პრეზიდენტმა ხაზგასმით აღნიშნა, რომ ერთადერთი ადამიანი, ვისგანაც გადაწყვეტილების მიღებაა საჭირო, ვლადიმირ პუტინია. თუმცა, ზელენსკის თქმით, კრემლის ლიდერი „არც კი იღებს სრულ სტატისტიკას იმის შესახებ, თუ რა ხდება სინამდვილეში“.

უკრაინის პრეზიდენტის განცხადებით, ქვეყნის გრძელვადიანი დარტყმების გეგმა ეტაპობრივად ხორციელდება და ამას უკვე მოჰყვა კონკრეტული ეკონომიკური შედეგები აგრესორი ქვეყნისთვის.