ზელენსკი: რუსეთმა იქამდე იომა, რომ მათი მთავარი აღლუმიც კი უკვე ჩვენზეა დამოკიდებული

უკრაინის პრეზიდენტმა, ვოლოდიმირ ზელენსკიმ განაცხადა, რომ 9 მაისის აღლუმის დამოკიდებულება უკრაინის შესაძლო ქმედებებზე მეტყველებს იმაზე, რომ რუსეთისთვის ომის შეწყვეტის დრო დიდი ხნის წინ დადგა.

„რუსეთმა ჩვენგან მიიღო მკაფიო წინადადება ზავისა და დიპლომატიის შესახებ და იცის, როგორ დაუკავშირდეს უკრაინას ან პარტნიორებს დეტალების შესათანხმებლად. თუ მოსკოვში მყოფ იმ ერთადერთ ადამიანს, რომელსაც ომის გარეშე ცხოვრება არ შეუძლია, მხოლოდ ერთი აღლუმი აინტერესებს და მეტი არაფერი, ეს სხვა საკითხია“, - ხაზგასმით აღნიშნა ზელენსკიმ.

ამავდროულად, სახელმწიფოს მეთაურმა დაარწმუნა საზოგადოება, რომ უკრაინა მზად არის მშვიდობისთვის იმუშაოს და მიისწრაფვის, ეს ომი ღირსეულად დაასრულოს.

„რუსეთმა იქამდე იომა, რომ მათი მთავარი აღლუმიც კი უკვე ჩვენზეა დამოკიდებული. ეს მკაფიო სიგნალია: საჭიროა [ომის] დასრულება“, - განაცხადა პრეზიდენტმა.