ზელენსკი საზღვარგარეთ უკვე მეორედ გაემგზავრა მოლდოვიდან და არა პოლონეთიდან

უკრაინის პრეზიდენტი ვოლოდიმირ ზელენსკი საფრანგეთში „დიდი შვიდეულის“ სამიტზე დასასწრებად მოლდოვის დედაქალაქ კიშინეუდან გაფრინდა. ინფორმაციას უკრაინული მედია ავრცელებს.

მედიის ცნობით, ზელენსკის თვითმფრინავი კიშინეუდან ჯერ ჟენევაში გაემგზავრა, საიდანაც საფრანგეთში გადავა.

როგორც უკრაინული მედია წერს, ეს უკვე მეორე შემთხვევაა უკანასკნელ პერიოდში, როცა ზელენსკი საერთაშორისო ვიზიტში არა პოლონეთიდან, არამედ მოლდოვიდან მიფრინავს. პირველად ეს დიდ ბრიტანეთში ვიზიტის დროს მოხდა.

ადრე, როგორც წესი, უკრაინის ლიდერი პოლონეთის ქალაქ ჟეშუვის აეროპორტით სარგებლობდა.

ზელენსკის მარშრუტის ცვლილება უკრაინასა და პოლონეთს შორის დაძაბული სიტუაციის ფონზე მოხდა. საუბარია უთანხმოებაზე, რაც გამოწვეულია ზელენსკის მიერ ერთ-ერთი სამხედრო ქვედანაყოფისთვის „უკრაინის მეამბოხე არმიის გმირების“ სახელის მინიჭებით. პოლონეთში ფიქრობენ, რომ „უკრაინის მეამბოხე არმია“ ვოლინის ტრაგედიასთან არის კავშირში.