ზელენსკიმ დაადასტურა, რომ მასთან კიევში შეხვედრაზე რომან აბრამოვიჩი იყო ჩასული

უკრაინის პრეზიდენტმა ვოლოდიმირ ზელენსკიმ განაცხადა, რომ რუსი ბიზნესმენი, რომელიც კიევში მასთან შესახვედრად ჩავიდა, რომან აბრამოვიჩი იყო. ამ თემაზე მან Sky News-სთვის მიცემულ ინტერვიუში ისაუბრა.

„ის კიევში იყო ჩამოსული და თქვა: „მე მაქვს გზავნილი უშუალოდ თქვენთვის და მსურს თქვენგანაც მივიღო გზავნილი პუტინისთვის გადასაცემად“. თუმცა აღნიშნა, რომ ეს ჩუმად, ყოველგვარი საჯაროობის გარეშე უნდა გაკეთებულიყო. მე ვუპასუხე: „ეს თქვენი არჩევანია. ჩვენთვის მნიშვნელობა არ აქვს - საჯარო იქნება ეს თუ არასაჯარო“, - განაცხადა უკრაინის პრეზიდენტმა.

ზელენსკის აზრით, აბრამოვიჩს სურდა გაეგო, თუ რისთვის იყო მზად კიევი სამშვიდობო მოლაპარაკებების საკითხში. ზელენსკიმ მას უთხრა, რომ უკრაინა რუსეთისთვის დონბასის დათმობას არ აპირებს.

„ეს იყო მთავარი გზავნილი. მე ვუთხარი, რომ ჩვენ არ წავალთ, ჩვენ ამგვარად გამარჯვებას არ დაგითმობთ“, - დასძინა ზელენსკიმ. მათ ასევე განიხილეს, თუ რა სახის კომპრომისებზე წასასვლელად არიან მხარეები მზად. ზელენსკიმ აბრამოვიჩს უთხრა, რომ კომპრომისები მხოლოდ ცეცხლის შეწყვეტის შემდეგ არის შესაძლებელი.

5 ივნისს, სანქტ-პეტერბურგის ეკონომიკური ფორუმის დროს, ვლადიმირ პუტინმა განაცხადა, რომ კიევში ზელენსკისთან შესახვედრად ერთ-ერთი რუსი ბიზნესმენი იმყოფებოდა. პუტინის მტკიცებით, სწორედ მისი საშუალებით გადასცა ზელენსკიმ რუსეთის პრეზიდენტთან შეხვედრის წინადადება. პუტინს ამ ბიზნესმენის ვინაობა არ დაუსახელებია.

მოგვიანებით, Financial Times-მა წყაროებზე დაყრდნობით გაავრცელა ინფორმაცია, რომ კიევში ზელენსკისთან შესახვედრად რომან აბრამოვიჩი ჩავიდა.