ზელენსკის განცხადებით, უკრაინელმა სამხედროებმა რუსეთის პერმის ოლქში ერთ-ერთი უმსხვილესი ქიმიური საწარმო დაბომბეს

უკრაინის შეიარაღებულმა ძალებმა დრონების საშუალებით რუსეთის პერმის ოლქში მდებარე ერთ-ერთი მნიშვნელოვანი ქიმიური საწარმო Metafrax Chemicals-ი დაბომბა. ინფორმაციას უკრაინის პრეზიდენტი ვოლოდიმირ ზელენსკი „ტელეგრამის“ საკუთარ არხზე ავრცელებს.

ზელენსკის განცხადებით, ქარხანა უკრაინის საზღვრიდან 1 700 კილომეტრში მდებარეობს.

„Metafrax Chemicals-ი რუსეთის ქიმიური ინდუსტრიის მნიშვნელოვან ნაწილს შეადგენს. აღნიშნული ქარხნის პროდუქციით ათეულობით სხვა სამხედრო საწარმო მარაგდება. საუბარია ავიატექნიკაზე, დრონებზე, რაკეტის ძრავებზე, ასაფეთქებელ მოწყობილობებზე. ახლა საწარმოში სამუშაო პროცესი შეჩერებულია“, - განაცხადა ზელენსკიმ.

ზელენსკიმ უკრაინის შეიარაღებულ ძალებს „შორი მანძილზე მოქმედი სანქციისთვის“ მადლობა გადაუხადა.