„ზღაპრების 12 წელი“ - უკრაინის ყოფილი მთავარსარდალი ზალუჟნი აცხადებს, რომ უკრაინა ნატოში არასდროს გაწევრიანდება

დიდ ბრიტანეთში უკრაინის ელჩმა, ვალერი ზალუჟნიმ განაცხადა, რომ მას არ სჯერა, რომ უკრაინა ოდესმე გახდება ნატოს წევრი და აღნიშნა, რომ ქვეყანამ ამის სანაცვლოდ ყურადღება უსაფრთხოების სხვა ალიანსების განვითარებაზე უნდა გაამახვილოს. ამის შესახებ ზალუჟნიმ კიევში, ელჩების დღევანდელ შეხვედრაზე განაცხადა.

ზალუჟნიმ აღნიშნული განცხადება მაღალი რანგის დიპლომატებს შორის ევროატლანტიკური ინტეგრაციის საკითხებზე გამართული დისკუსიისას გააკეთა. მიუხედავად იმისა, რომ შეკითხვა გაერთიანებულ ექსპედიციურ ძალებში (JEF) უკრაინის მონაწილეობას ეხებოდა, ელჩმა გამოსვლა ნატოზე საუბრით დაიწყო.

„ნატოს ძალიან კარგად ვიცნობ. დაახლოებით 12 წელი პირადად ვმუშაობდი იმისთვის, რომ ნატოს სტანდარტებზე გადავსულიყავით და ყოველწლიურად ვისმენდი ზღაპრებს, თითქოს ალიანსში შესვლამდე ერთი ნაბიჯიღა გვაშორებდა. სამწუხაროდ, ჩვენ იქ არასდროს გავწევრიანდებით!“ - აღნიშნა მან.

ზალუჟნის განმარტებით, უკრაინის ალიანსში ინტეგრაციის ერთ-ერთი მთავარი ბარიერი ისაა, რომ „უკრაინის შეიარაღებული ძალების თანამედროვე შესაძლებლობების გათვალისწინებით, შეუძლებელია გახდე იმ ორგანიზაციის წევრი, რომელიც დღემდე მეორე მსოფლიო ომის პერიოდის დოქტრინებით ხელმძღვანელობს“.

ელჩმა მკვეთრად გააკრიტიკა ნატოს საერთო შესაძლებლობებიც, მიუხედავად იმისა, რომ ალიანსის წევრები ისეთი ქვეყნები არიან, როგორებიცაა დიდი ბრიტანეთი და აშშ.

„დიდი ალბათობით, ნატო შეინარჩუნებს ამჟამინდელ სახეს და კიდევ 12 წელს დახარჯავს (ზუსტად ისე, როგორც ეს უკრაინამ გააკეთა) იმ სტანდარტებზე გადასასვლელად, რაც აუცილებელია რუსეთის დონის ნახევრისთვის მაინც მიღწევად“, - აღნიშნა მან.

ამასთან, ზალუჟნიმ აღნიშნა, რომ „უკრაინას ესაჭიროება ტექნოლოგიები, რომლებიც ამჟამად ნატოს წევრ ქვეყნებს აქვთ“, მათ შორის ანტიბალისტიკური თავდაცვისა და კოსმოსურ სფეროებში.