ზურაბ ჩიკვილაძე ოპოზიციას: კრწანისის ტყე-პარკის მიმდებარედ დაგეგმილი მშენებლობის კომენტირებისას საზოგადოებისთვის მცდარი ინფორმაციის მიწოდებას თავი დაანებეთ

ძალიან გთხოვთ, კრწანისის ტყე-პარკის მიმდებარედ დაგეგმილი მშენებლობის კომენტირებისას საზოგადოებისთვის მცდარი ინფორმაციის მიწოდებას თავი დაანებეთ, - ასე მიმართა დედაქალაქის საკრებულოს სხდომაზე საკრებულოს ფრაქცია „ქართული ოცნება - დემოკრატიული საქართველოს“ თავმჯდომარემ, ზურაბ ჩიკვილაძემ, ოპოზიციონერ კოლეგებს კრწანისის ტყე-პარკის მიმდებარედ დაგეგმილი მშენებლობის კომენტირებისას, რომელსაც დეველოპერული კომპანია „იგლ ჰილსი“ ახორციელებს.

ზურაბ ჩიკვილაძის განცხადებით, რამდენიმე თვის წინ საკრებულოს დელეგაცია სერბეთის დედაქალაქ ბელგრადში იმყოფებოდა, სადაც ადგილობრივი მერიისა და საკრებულოს წარმომადგენლებს შეხვდა. „ბელგრადის დათვალიერებისას აღმოვაჩინეთ, რომ ზუსტად სამი წელია კომპანია „იგლ ჰილსი“ მათთან გამორჩეულ ადგილებში აშენებს კომპლექსებს და როგორც აღმოჩნდა, ამ მშენებლობებმა ქალაქის განვითარებაზე მხოლოდ და მხოლოდ დადებითად იმოქმედა.

მათ მოგვცეს სტატისტიკაც, რომ კომპლექსებში ქონების 90 %-ზე მეტი უკვე შეძენილი აქვთ სერბეთის მოქალაქეებს. ასე რომ, ძალიან გთხოვთ, გამოიყენეთ ტექნოლოგიები და ნახეთ, რომ კომპანია „იგლ ჰილსი“ ევროპის ძალიან ბევრ ქვეყანაში ახორციელებს ინვესტიციას“, - განაცხადა ზურაბ ჩიკვილაძემ.