ზურაბ პატარაძემ საპატიო ქობულეთელების დაჯილდოების ცერემონიაში მიიღო მონაწილეობა

ქობულეთის მუნიციპალიტეტში, პეტრას ციხის არქეოლოგიურ-არქიტექტურულ კომპლექსში, „საპატიო ქობულეთელის“ დაჯილდოების ცერემონია გაიმართა. ინფორმაციას აჭარის მთავრობა ავრცელებს.

ღონისძიებას აჭარის მთავრობის თავმჯდომარე ზურაბ პატარაძე რეგიონის უმაღლესი საბჭოს თავმჯდომარესთან, ცოტნე ანანიძესთან, აჭარის მთავრობისა და ადგილობრივი თვითმმართველობის წარმომადგენლებთან ერთად დაესწრო.

სტუმრებს ქობულეთის მუნიციპალიტეტის მერი ირაკლი ცეცხლაძე მიესალმა. საზოგადოებას სიტყვით მიმართეს აჭარის მთავრობის თავმჯდომარემ ზურაბ პატარაძემ და აჭარის უმაღლესი საბჭოს თავმჯდომარემ, ცოტნე ანანიძემ.

ზურაბ პატარაძემ ნომინანტებს მრავალწლიანი ნაყოფიერი საქმიანობისა და მუნიციპალიტეტის განვითარებაში შეტანილი განსაკუთრებული წვლილისთვის მადლობა გადაუხადა. მთავრობის თავმჯდომარემ აღნიშნა, რომ საზოგადოებისთვის გამორჩეული ადამიანების ღვაწლის დაფასება და მომავალი თაობებისთვის გადაცემა ხელისუფლების ერთ-ერთი უმთავრესი ამოცანაა.

„აჭარის ექვსივე მუნიციპალიტეტში არსებობს გამორჩეული ადამიანების დაჯილდოების ტრადიცია. დღეს „საპატიო ქობულეთელები“ დავაჯილდოვეთ და გვქონდა შესაძლებლობა პირადად მიგველოცა მათთვის. ქობულეთელობა მართლაც განსაკუთრებული ღირსება და პასუხისმგებლობაა. სასიხარულოა, რომ დღეს სამი თაობის ქობულეთელები შევიკრიბეთ და სიყვარულით აღვნიშნეთ ის ღვაწლი, ჩართულობა რაც ქობულეთის განვითარებისთვის გააკეთეს. დარწმუნებული ვარ, ეს მნიშვნელოვანი ტრადიცია მომავალშიც გაგრძელდება და არაერთხელ გვექნება შესაძლებლობა პატივი მივაგოთ იმ ადამიანებს, რომლებიც თავიანთი საქმიანობითა და ღირსეული ცხოვრებით ამშვენებენ ჩვენს მუნიციპალიტეტებს“, - აღნიშნა ზურაბ პატარაძემ.

ცერემონიის ფარგლებში, აჭარის მთავრობის თავმჯდომარემ „საპატიო ქობულეთელის“ ჯილდო პირადად გადასცა სპორტსმენ ირაკლი თურმანიძესა და ექიმ-კარდიოლოგ ბესიკ კაკალაძეს.

წელს „საპატიო ქობულეთელის“ ტიტული მუნიციპალიტეტის ხუთ გამორჩეულ მოქალაქეს გადაეცა.