კობახიძის თქმით, აშშ-სგან პარტიების აკრძალვის სარჩელის გამოტანაზე საუბარი უსამართლობა იქნებოდა - Netgazeti

ირაკლი კობახიძის განცხადებით, თუ აშშ-ის ამჟამინდელი ადმინისტრაციის მხრიდან იმის შესახებ საუბარი იქნება, რომ „ქართულმა ოცნებამ“ ოპოზიციური პარტიების აკრძალვის შესახებ საკონსტიტუციო სარჩელი გაიტანოს, წინა ადმინისტრაციის „უსამართლობის გაგრძელება“ იქნებოდა.

კობახიძემ აშშ-ის წინა ადმინისტრაცია დაადანაშაულა საქართველოში საბოტაჟის ხელშეწყობაში და განაცხადა, რომ დონალდ ტრამპის ადმინისტრაციის მიდგომა შეცვლილია. კობახიძის თქმით, ეს „ქართულ ოცნებას“ ოპტიმიზმის საფუძველს აძლევს, რომ ამერიკასთან სტრატეგიული პარტნიორობა „სუფთა ფურცლიდან“ აღდგეს.

„ჩვენ გვქონდა პირველი, ძალიან საინტერესო შეხვედრა კონკრეტულ საკითხებთან დაკავშირებით. რა თქმა უნდა, მზად ვართ, რომ ეს დისკუსია განვაგრძოთ. მთავარი, რის საფუძველზეც შეიძლება, რომ გადაიტვირთოს ურთიერთობები, ეს არის სამართლიან მიდგომებზე დაბრუნება. რაც კი რამ გაფუჭდა ქართულ-ამერიკულ ურთიერთობებში გასული წლების განმავლობაში, ყველაფერი გაფუჭდა სწორედ უსამართლო დამოკიდებულების გამო, რასაც ავლენდა წინა ადმინისტრაცია. რაც იყო გაფუჭებული უსამართლობის საფუძველზე, ის შეიძლება გასწორდეს მხოლოდ სამართლიანი მიდგომის დამკვიდრების საფუძველზე. სამართლიანი მიდგომა არის ის, რომ ყველამ უნდა სცეს პატივი ჩვენს ეროვნულ ინტერესებს, არჩევნების შედეგებს, ქართველი ხალხის ნებას, ეს უნდა იყოს საერთო დამოკიდებულება, რასაც არ ითვალისწინებდა წინა ამერიკული ადმინისტრაცია. ისინი არც ჩვენს ეროვნულ ინტერესებს სცემდნენ პატივს და არც არჩევნების შედეგს სცეს პატივი. შესაბამისად, არათუ არ მოუწოდებდნენ ოპოზიციას, რომ თავი შეეკავებინათ საბოტაჟისგან, პირიქით, თავად იყვნენ საბოტაჟის წამხალისებლები“,- განაცხადა ირაკლი კობახიძემ.

ამასთან, კობახიძის თქმით, ამოსავალი წერტილი საქართველოში კანონის უზენაესობის პატივისცემა იქნებოდა.

„ჩვენ აღქმაში ამ სარჩელის გამოტანაზე საუბარი, მაგალითად, იქნებოდა იმ უსამართლობის გაგრძელება, რასაც ვხედავდით წინა ადმინისტრაციის მხრიდან. ყველამ უნდა სცეს პატივი სამართლის უზენაესობას ჩვენს ქვეყანაში. როდესაც საუბარია სარჩელზე, რომელიც შედის საქართველოს საკონსტიტუციო სასამართლოში, ყველა პატივისცემით უნდა მოეკიდოს შესაბამის სამართლებრივ პროცესსა და სამართლებრივ პროცედურებს, ეს იქნებოდა ჩვენი თხოვნა და მოთხოვნა. სამართლის უზენაესობას ყველამ უნდა სცეს პატივი, ეს არის ძალიან მნიშვნელოვანი. როდესაც სამართლიანობაზე ვსაუბრობთ, სწორედ, ეს არის ამოსავალი წერტილი. სამართლის უზენაესობის პატივისცემა არის სამართლიანობის ერთ-ერთი გამოხატულება“,- განაცხადა კობახიძემ.