გვეუბნებიან, თქვენ შეერკინეთ ახლა რუსეთსო, მერე ჩვენ რუსეთს ფულს გადავუხდით, იმიტომ, რომ ნავთობი გვჭირდება, აბა ხომ არ გავიყინებით და სინათლეც გვინდა, და საქართველოს რა ინტერესები ექნება, რაში აინტერესებს ევრობიუროკრატიას - გურამ მაჭარაშვილი

მორიგი უსამართლო მიდგომა და ორმაგი სტანდარტი - ასე აფასებენ თბილისში ანგარიშს, რომლის მიხედვითაც ევროკავშირის ქვეყნებმა რუსეთიდან თხევადი ბუნებრივი აირის იმპორტი გაზარდეს.

"ფულს ვის ურიცხავთ, რუსეთის ფედერაციას, რომელმაც 2008 წლის ომი მოახდინა საქართველოში, დღემდე მეხუთე წელია უკრაინაში ომი მიმდინარეობს, ხალხი იღუპება და ამ დროს ევროკავშირი ფულს ურიცხავს რუსეთს, რომ შეიძინოს მერე ტყვიები, იარაღი და ებრძოლოს უკრაინას. და, ჩვენ გვეუბნებიან საქართველოს, თქვენ შეერკინეთ ახლა რუსეთსო, მერე ჩვენ რუსეთს ფულს გადავუხდით, იმიტომ, რომ ნავთობი გვჭირდება, აბა ხომ არ გავიყინებით და სინათლეც გვინდა, და საქართველოს ახლა, რა ინტერესები ექნება, რაში აინტერესებს ევრობიუროკრატიას," - განაცხადა საპარლამენტო პოლიტიკური ჯგუფის, "ხალხის ძალის" თავმჯდომარის მოადგილემ, გურამ მაჭარაშვილი,

გამოცემა WELT-ის ცნობით, ივნისში, რუსეთიდან თხევადი ბუნებრივი აირის იმპორტი, გასული წლის იმავე თვესთან შედარებით, 14%-ით არის მომატებული. ანგარიშის მიხედვით, რუსეთში გაყიდვებიდან დღეში დაახლოებით 60 მილიონი ევრო შედის. რუსეთიდან თხევადი ბუნებრივი აირის ყველაზე მსხვილი იმპორტიორი საფრანგეთი იყო. "ეს იმ ფონზე როდესაც ევროკავშირი რუსულ გაზზე დამოკიდებულების შემცირების პოლიტიკას ატარებს და 2027 წლისთვის რუსულ ბუნებრივ და თხევად აირზე სრულად უარის თქმას გეგმავს" - წერია სტატიაში.