"10-სართულიან სახლს 10 დღეში ააშენებ?!" - რატომაა არარეალისტური 2029 წელს ანაკლიის ამოქმედება?

ეკონომიკისა და მდგრადი განვითარების ყოფილი მინისტრი გიორგი ქობულია, ანაკლიის ღრმაწყლოვანი პორტის ამოქმედების თარიღად ხელისუფლების მიერ დასახელებულ თარიღს სკეპტიკურად უყურებს.

როგორც მან ამ თემაზე საუბრისას BMGTV-ის გადაცემა "წერტილთან" ინტერვიუში განაცხადა, არ აქვს არანაირი მოლოდინი, რომ 2029 წელს ანაკლიის პორტი პირველ გემს მიიღებს.

"მაყურებლისთვის მარტივად რომ ავხსნათ: ძალიან ბევრი ფულიც რომ გქონდეს, 10-სართულიან სახლს 10 დღეში ააშენებ?! ვერა, რადგან ტექნოლოგიურ პროცესს, ბეტონის გაშრობას თავისი დრო სჭირდება. როდესაც საუბარია ასეთ მასშტაბურ საზღვაო ინფრასტრუქტურაზე, სადაც ტენდერებიც კი არ დაგიწყია და ამას ემატება სახელმწიფო მანქანის მოუქნელობა, 2029 წელს გემის მიღება წარმოუდგენელია. სახელმწიფო ნაწილის აშენების შემდეგ, ტერმინალის ოპერატორებმაც ხომ უნდა მოაწყონ საკუთარი ინფრასტრუქტურა?! ეს პარალელურადაც რომ მოხდეს, მაინც უაღრესად რთული და დროში გაწელილი პროცესია. არ ველოდები, რომ 2029 წელს ანაკლიაში გემი შევა", - აცხადებს ყოფილი მინისტრი და იქვე დასძენს, რომ 2032 წელს მაინც თუ დასრულდება ანაკლიის პორტის მშენებლობა, ის ბედნიერი იქნებოდა.

გიორგი ქობულიას ძირითადი შეკითხვა პორტის ამოქმედების ვადებს კი არ ეხება, არამედ სტრატეგიულ გათვლებს.

"მე არც ფოთის პორტს ვემხრობი და არც - ანაკლიის პორტს, მე ვემხრობი იმას, რაც იქნება ჩვენი ქვეყნისთვის უფრო ეფექტიანი. აი, დღეს, მაგალითად, მე ვუსვამ კითხვას ხელისუფლებას: სად არის შედარებითი ანალიზი - ანაკლია აშენდეს თუ ფოთის პორტი [გაფართოვდეს]?!", - აცხადებს ყოფილი მინისტრი, რომელიც მოქმედ მთავრობას ურჩევს, დროულად შეარჩიოს პოტენციური ოპერატორები, რომლებიც მზად იქნებიან, ანაკლიის პორტში სატერმინალო ინფრასტრუქტურაში ინვესტიციები ჩადონ.