2026 წლის 9 თვეში ექსპლუატაციაში 2 307 ობიექტი მიიღეს - კლება 5.9%-ია

2026 წლის იანვარ-სექტემბერში ქვეყანაში სულ 2 307 ობიექტი მიიღეს ექსპლუატაციაში, რომელთა საერთო ფართობმა 2 543 645 კვადრატული მეტრი შეადგინა - ამის შესახებ ინფორმაციას საქსტატი ავრცელებს.

2025 წლის ანალოგიურ პერიოდთან შედარებით, ექსპლუატაციაში მიღებული ობიექტების რაოდენობა 5.9%-ით შემცირდა, თუმცა დასრულებული საერთო ფართობი 2.8%-ით აღემატება გასული წლის 9 თვის ნიშნულს (2.48 მლნ მ²).

დასრულებულ შენობებში მთავარ მიმართულებად კვლავ საცხოვრებელი უძრავი ქონება რჩება, რომლის წილიც მთლიან ექსპლუატაციაში შესულ ფართობში გაიზარდა:

2025 წლის 9 თვეში საცხოვრებელ შენობებზე მიღებული ფართობი 1.72 მილიონ მ²-ს შეადგენდა, 2026 წლის იანვარ-სექტემბერში კი ამ მაჩვენებელმა 1.79 მილიონ კვადრატულ მეტრს მიაღწია, რაც ექსპლუატაციაში მიღებული მთლიანი ფართობის 70.5%-ს შეადგენს.

შესაბამისად, წლიურ ჭრილში საცხოვრებელ სეგმენტში ობიექტების რაოდენობა მცირედით - 4.1%-ით შემცირდა, თუმცა დასრულებული ფართობი 4.5%-ით გაიზარდა.

ექსპლუატაციაში მიღებული ობიექტების რეგიონული განაწილება

ქვეყანაში ექსპლუატაციაში შესული მთლიანი ფართობის 55.8% დედაქალაქზე მოდის, ხოლო 19.4% - აჭარაზე.

რეგიონებში ექსპლუატაციაში მიღებული ობიექტების განაწილება ასე გამოიყურება:

რეგიონი ექსპლუატაციაში მიღებული ობიექტები 2025 ექსპლუატაციაში მიღებული ობიექტები 2026 ცვლილება საერთო ფართობი (მ².) 2025 საერთო ფართობი (მ².) 2026 ცვლილება ქ. თბილისი 854 749 -12.3% 1 431 967 1 418 698 -0.9% აჭარის არ 84 86 +2.4% 245 709 492 770 +100.6% ქვემო ქართლი 223 198 -11.2% 139 435 133 566 -4.2% მცხეთა-მთიანეთი 311 321 +3.2% 106 843 132 207 +23.7% კახეთი 284 282 -0.7% 125 291 89 151 -28.8% იმერეთი 200 141 -29.5% 215 050 87 652 -59.2% შიდა ქართლი 171 186 +8.8% 98 843 63 034 -36.2% სამეგრელო-ზემო სვანეთი 127 140 +10.2% 53 411 54 241 +1.6% სამცხე-ჯავახეთი 107 126 +17.8% 25 040 38 187 +52.5% გურია 71 61 -14.1% 30 032 29 931 -0.3% რაჭა-ლეჩხუმი და ქვემო სვანეთი 20 17 -15.0% 3 602 4 208 +16.8% საქართველო სულ 2 452 2 307 -5.9% 2 475 223 2 543 645 +2.8%

ექსპლუატაციაში მიღებული ობიექტების დარგობრივი განაწილება

დასრულებული ფართობის მატება დაფიქსირდა სასტუმროების სექტორშიც: 2026 წლის 9 თვეში ექსპლუატაციაში 40 სასტუმრო შევიდა, ჯამური 192 778 მ² ფართობით. 2025 წლის ანალოგიურ პერიოდში 52 ობიექტზე 181 545 მ² მოდიოდა. შესაბამისად, ობიექტების რაოდენობა 23.1%-ით შემცირდა, თუმცა ფართობი 6.2%-ით გაიზარდა.

კომერციულ სეგმენტში სავაჭრო ობიექტებზე მიღებული ფართობი თითქმის უცვლელი დარჩა: დასრულდა 231 ობიექტი საერთო ფართობით 132 059 მ² (2025 წლის 9 თვეში - 267 ობიექტი და 130 848 მ², ზრდა +0.9%).

მკვეთრი ზრდა აღირიცხა სასწავლო დაწესებულებებზე: დასრულდა 14 ობიექტი 35 974 მ² ფართობით, რაც წინა წლის ანალოგიური პერიოდის მაჩვენებელს ორჯერ აღემატება.

ადმინისტრაციული დანიშნულების შენობებში ექსპლუატაციაში 27 ობიექტი შევიდა, 47 789 მ² ფართობით, რაც 2025 წლის 9 თვის მაჩვენებელზე 39%-ით მეტია.

კლება დაფიქსირდა სამრეწველო და სასაწყობო შენობების მიმართულებით - ექსპლუატაციაში მიღებული ობიექტების რიცხვი 258-დან 229-მდე, ხოლო ფართობი 238 166-დან 212 641 მ²-მდე შემცირდა (-10.7%).

კლება დაფიქსირდა სპორტულ ნაგებობებშიც, სადაც მიღებული ფართობი 43 377-დან 6 341 მ²-მდე შემცირდა, მიუხედავად იმისა, რომ დასრულებული შენობების რაოდენობა არ შეცვლილა.

სასოფლო-სამეურნეო დანიშნულების ობიექტების ფართობი კი 43 634-დან 33 542 მ²-მდე, 23.1%-ით შემცირდა, სადაც ექსპლუატაციაში 46 შენობა შევიდა.