28-29 სექტემბერს, AIIB-ის მე-11 წლიურ შეხვედრაში საქართველოს ფინანსთა მინისტრი მიიღებს მონაწილეობას
28-29 სექტემბერს, საქართველოს ფინანსთა მინისტრი ლაშა ხუციშვილი მონაწილეობს აზიის ინფრასტრუქტურის საინვესტიციო ბანკის (AIIB) მე-11 წლიურ შეხვედრაში, რომელიც კატარის დედაქალაქ დოჰაში იმართება.
ფინანსთა სამინისტროს ინფორმაციით, შეხვედრაში, ასევე, მონაწილეობას მიიღებს ფინანსთა მინისტრის მოადგილე ეკატერინე გუნცაძე.
"ვიზიტის ფარგლებში, დაგეგმილია შეხვედრები აზიის ინფრასტრუქტურის საინვესტიციო ბანკის ხელმძღვანელობასთან. ფინანსთა მინისტრი მონაწილეობას მიიღებს მმართველთა საბჭოს სხდომაში, ასევე, სიტყვით გამოვა ბანკის მმართველთა ბიზნეს სესიაზე.
წლიური შეხვედრის ფარგლებში, საქართველოსა და აზიის ინფრასტრუქტურის საინვესტიციო ბანკს შორის გაფორმდება სასესხო შეთანხმება (ტრანსკასპიური სატრანსპორტო დერეფანი – საქართველოს ხელმისაწვდომობისა და ტრანსპორტის გაუმჯობესების პროექტი)", - ნათქვამია გავრცელებულ პრესრელიზში.
BM.GE
წყარო: bm.ge