8 წლის შემდეგ, ზურაბ პატარაძე აჭარის მთავრობის თავმჯდომარედ მეორედ დაამტკიცეს

აჭარის უმაღლესმა საბჭომ რეგიონის მთავრობის თავმჯდომარის პოსტზე ზურაბ პატარაძეს ნდობა კიდევ ერთხელ გამოუცხადა. კენჭისყრაზე პატარაძესთან ერთად დამტკიცდა მინისტრთა კაბინეტის სრული შემადგენლობაც.

საკუთარ გამოსვლაში პატარაძემ ძირითადი აქცენტი დაწყებული პროექტების უწყვეტობაზე გააკეთა და დეპუტატებს სამომავლო სამოქმედო გეგმა გააცნო.

„რეგიონში დაწყებული ყველა მნიშვნელოვანი პროექტი გაგრძელდება. პოლიტიკურ გუნდთან ერთად ვიზრუნებ რეგიონის განვითარებაზე“,- განაცხადა ზურაბ პატარაძემ უმაღლეს საბჭოში სიტყვით გამოსვლისას.

პატარაძის წარდგენილ გუნდში პორტფელები ასე გადანაწილდა: ნინო ნიჟარაძე (ჯანდაცვა), მაია ხაჯიშვილი (განათლება), ელისო ბოლქვაძე (კულტურა), დენის სალუქვაძე (სოფლის მეურნეობა) და ედნარ ნატარიძე (ფინანსები).

აღსანიშნავია, რომ პატარაძის მთავრობას მხარი არ დაუჭირა ოპოზიციამ — პარტია „გახარია საქართველოსთვის“ წევრებმა კენჭისყრაში მონაწილეობაზე უარი თქვეს და პროცესს ბოიკოტი გამოუცხადეს.

პოსტი ვაკანტური მას შემდეგ გახდა, რაც სულხან თამაზაშვილი შს მინისტრად დაინიშნა.