აგვისტოდან თბილისიდან ბათუმში მატარებლით მგზავრობას 4 საათი დასჭირდება - მინისტრის მოადგილე
აგვისტოს თვიდან საქართველოს რკინიგზის მომხმარებლები თბილისიდან ბათუმში მგზავრობას 4 საათში შეძლებენ. ამის შესახებ ეკონომიკისა და მდგრადი განვითარების მინისტრის მოადგილემ, თამარ იოსელიანმა განაცხადა.
რკინიგზა აღნიშნულ რეისს 4 საათში 3 აგვისტოდან ასრულებს. მინისტრის მოადგილის განმარტებით, მგზავრობის დროის შემცირება რკინიგზაში განხორციელებული მასშტაბური ინფრასტრუქტურული სამუშაოებისა და უღელტეხილის მონაკვეთზე მოდერნიზაციის პროექტის დასრულების შედეგად გახდა შესაძლებელი.
„ქსელზე განხორციელდა მასშტაბური და კომპლექსური ინფრასტრუქტურული მოდერნიზაცია, შესაბამისად, შევძელით მგზავრობის დროის შემცირება. ეს თავისთავად აისახება როგორც მგზავრთნაკადზე, მის გაორმაგებაზე, ასევე ტურისტულ მიმართულებებზე“, - აღნიშნა იოსელიანმა.
ინფრასტრუქტურის გაჯანსაღების პარალელურად, რეაბილიტაცია ჩაუტარდა მოქმედ სამგზავრო სადგურებსაც. სამინისტროს ინფორმაციით, განახლებული ინფრასტრუქტურა მიზნად ისახავს რკინიგზის დატვირთვის გაზრდასა და მგზავრებისთვის უფრო კომფორტული და უსაფრთხო მომსახურების შეთავაზებას.
BM.GE
წყარო: bm.ge