ახლო აღმოსავლეთში მოლაპარაკებების განახლების ფონზე ნავთობის ფასი ეცემა

ახლო აღმოსავლეთში კონფლიქტის დეესკალაციისა და ჰორმუზის სრუტეში ნაოსნობის შესაძლო აღდგენის მოლოდინის ფონზე, ნავთობი გაიაფებას განაგრძობს. დღევანდელ სავაჭრო სესიაზე Brent-ის მარკის ნავთობის ფასი 1.5%-ით შემცირდა და ბარელზე $86.7 შეადგინა, რაც ზედიზედ მეოთხე დღეა კლების ტენდენციაზე მიუთითებს. საერთო კორექცია უკვე 7.5%-ს აღწევს.

პარალელურად, ამერიკული WTI-ის ტიპის ნავთობის ღირებულება 1.4%-ით გაიაფდა და ბარელზე $81.1-ს გაუტოლდა.

ბაზარზე ფასების კლება ირანსა და კატარს შორის დიპლომატიური კონტაქტების გააქტიურებას უკავშირდება. არსებული ინფორმაციით, კატარის პრემიერ-მინისტრი თეირანში ჩადის, რათა თითქმის ექვსთვიანი სამხედრო დაპირისპირების დასასრულებლად მოლაპარაკებები განაახლოს.

პარალელურად, ირანის მაღალჩინოსნების ცნობით, თეირანი და ომანი ჰორმუზის სრუტეზე ერთობლივი კონტროლისა და სავაჭრო გზების უსაფრთხოების შეთანხმების დეტალებს ათანხმებენ. აშშ-ის მიერ ირანზე საჰაერო დარტყმების დროებით შეჩერებამ და ეკონომიკურ სანქციებზე ფოკუსირებამ კი ინვესტორებს შორის გააჩინა მოლოდინი, რომ სამხედრო კონფლიქტი აღარ განახლდება.