Alibaba-მ თანამშრომლებს Anthropic-ის პროგრამების გამოყენება აუკრძალა

ჩინურმა ტექნოლოგიურმა გიგანტმა Alibaba-მ თანამშრომლებს ამერიკული AI სტარტაპის, Anthropic-ის ხელოვნური ინტელექტის პროგრამების სამუშაო მიზნებისთვის გამოყენება აუკრძალა.

არსებული ინფორმაციით, ეს გადაწყვეტილება ძალაში 10 ივლისიდან შევა. როგორც ჩინურ კომპანიაში განმარტავენ, მიზეზი Anthropic-ის სისტემაში უსაფრთხოებასთან დაკავშირებული ფარული რისკების აღმოჩენა გახდა.

Alibaba-ს მენეჯმენტმა Anthropic-ის პროგრამა Claude Code-ი მაღალი რისკის მქონე პროგრამათა სიაში უკვე შეიყვანა. თანამშრომლებს ამ მოდელების დეინსტალაცია და ჩინური კომპანიის საკუთარი ასისტენტის, Qoder-ის გამოყენება დაევალათ.

მნიშვნელოვანია ითქვას, რომ Alibaba-ს ეს ნაბიჯი Anthropic-ის მიერ ივნისში აშშ-ის სენატის შესაბამისი კომიტეტისთვის გაგზავნილ იმ წერილს მოჰყვა, რომლითაც ამერიკული მხარე ჩინურ კონკურენტებს ხელოვნური ინტელექტის შესაძლებლობების უკანონოდ მოპოვების მცდელობაში ადანაშაულებდა. Anthropic-ის წარმომადგენლები წერდნენ, რომ რიგი ჩინური კომპანიები მათ რესურსებს ბოროტად იყენებდნენ.

ცნობისთვის, Alibaba არ არის ერთადერთი ჩინური კომპანია, რომელმაც მსგავსი ნაბიჯი გადადგა. ჯერ კიდევ გაზაფხულზე, TikTok-ის შემქმნელმა ByteDance-მა Anthropic-თან თანამშრომლობა გაწყვიტა.