"ამ საკითხის მოგვარებისას ერთ-ერთი სერიოზული პრობლემა ფარმაცევტული კომპანიებია" - კობახიძე დიუშენის მედიკამენტებზე

“არავის ენანება არც 1 თეთრი და არც 50 და არც 150 მლნ იმაში, რასაც მოაქვს კონკრეტული შედეგი - ეს ზოგადი მიდგომაა”, - ასე უპასუხა საქართველოს პრემიერ-მინისტრმა, ირაკლი კობახიძემ ჟურნალისტების კითხვას, რომელიც დიუშენის კუნთოვანი დისტროფიის მედიკამენტების შემოტანას შეეხებოდა.

ჟურნალისტებმა პრემიერს ჰკითხეს თუ აპირებდა ის დიუშენის სინდრომის ბავშვების მშობლებთან შეხვედრას, რომლებიც მთავრობის ადმინისტრაციასთან დღესაც მართავენ აქციას და აპირებს თუ არა ხელისუფლება მედიკამენტების მწარმოებელ იმ კომპანიებთან კომუნიკაციას, რომლებიც დიუშენის მედიკამენტების საკითხზე საქართველოს მთავრობასთან სალაპარაკოდ მზად არიან.

პრემიერის განცხადებით, საკითხი მგრძნობიარეა და პროცესში ჯანდაცვის სამინისტრო სრულად არის ჩართული. კობახიძე აცხადებს, რომ დიუშენის სინდრომის მქონე ბავშვების მედიკამენტებით უზრუნველყოფისას ფარმაცევტული კომპანიები ერთ-ერთი სერიოზული პრობლემაა.

„ეს არის მგრძნობიარე საკითხი. ჯანდაცვის სამინისტრო არის ბოლომდე ჩართული ამ საკითხთან დაკავშირებით დისკუსიის გაგრძელებაში. რაც შეეხება ფარმაცევტულ კომპანიებს, ერთ-ერთი სერიოზული პრობლემა ამ საკითხების მოგვარების დროს არის სწორედ ფარმაცევტული კომპანიები.

არის მარტივი მაფია ჩამოყალიბებული - ამ მაფიას აქვს კონკრეტული წამლების რეალიზაციის ინტერესი, სხვადასხვა მიმართულებით გამოიკვეთა ეს ყველაფერი. ამიტომ აქ არის სწორედ სიფრთხილე, როდესაც ფარმაცევტულ კომპანიებს ეხება საქმე. მსოფლიო მასშტაბით არის ეს მაფია გაშლილი, ეს მარტო საქართველოს არ ეხება. ამიტომ, ყველა საკითხი უნდა იყოს აწონ-დაწონილი გონივრულად. არავის არ ენანება არც ერთი თეთრი და არც 50 და არც 150 მილიონი იმაში, რასაც მოაქვს კონკრეტული შედეგი - ეს არის ზოგადი მიდგომა. რაც შეეხება კონკრეტიკას, ამასთან დაკავშირებით ჯანდაცვის სამინისტროს აქვს კომუნიკაცია, ჯანდაცვის სამინისტრო მუშაობს და ჯანდაცვის სამინისტრო წარმოადგენს ყოველ ჯერზე პოზიციას“, - თქვა მან.