ანაკლიამდე მისასვლელი გზა ₾327 მლნ ჯდება, მაგრამ მშენებლობა ჯერ არც დაწყებულა - რკინიგზის ფული ბიუჯეტშიც არ ჩანს
საქართველოს მთავრობა ანაკლიის ღრმაწყლოვანი პორტის აშენებას თავად გეგმავს. ახალი მოდელით, პორტის 100%-ის წილი სახელმწიფო საკუთრებაში იქნება და მთავრობა მეიჯარის როლს შეასრულებს - მოიწვევს რამდენიმე უცხოურ კომპანიას, რომლებიც სახელმწიფოს მიერ აშენებულ საპორტო ინფრასტრუქტურაში მოაწყობენ ტერმინალებს და გრძელვადიანი იჯარით იოპერირებენ.
ეკონომიკის სამინისტროს შეფასებით, პროექტის ამ სახით განხორციელებას $200 მილიონი დოლარით მეტი დასჭირდება, ვიდრე წინა პროექტს. ეკონომიკის მინისტრის, მარიამ ქვრივიშვილის განცხადებით, მიმდინარეობს მოლაპარაკებები საერთაშორისო საფინანსო ინსტიტუტებთან ამ ახალი კონცეფციის ფარგლებში დაფინანსების მოზიდვასთან დაკავშირებით. ამასთან, მთავრობა ინარჩუნებს პირობას, რომ პორტი გემებს 2029 წელს მიიღებს.
თავის მხრივ ანაკლიის ღრმაწყლოვანი პორტის პროექტის განუყოფელი ნაწილია ახალი რკინიგზა და გზა, რომლის გარეშეც პორტში ვერც ტვირთი და ვერც მეზღვაურები ვერ მოხვდებიან. შესაბამისად, მნიშვნელოვანია რომ პორტის ნავსადგურების განვითარების პარალელურად, გზის და რკინიგზის დასრულება და ოპერირებაში შეყვანა ერთმანეთთან თანხვედრაში იყოს.
როგორც ცნობილია საქართველოს მთავრობა ანაკლიის პორტის პროექტისთვის ახალი საკრედიტო დაფინანსების მოზიდვაზე ADB-სთან მართავს მოლაპარაკებებს. BMG-იმ ADB-ს მიმართა კითხვით თუ რა ეტაპზეა აღნიშნული მოლაპარაკებები, სადაც აღნიშნეს, რომ ახალი კონცეფციის ფარგლებში მოლაპარაკებები ჯერ ადრეულ ეტაპზეა.
გარდა უშუალოდ პორტის მშენებლობის დაფინანსებისა, საქართველოს მთავრობა ADB-თან უკვე რამდენიმე წელია მართავს მოლაპარაკებებს პორტამდე მისასვლელი გზის და რკინიგზის დაფინანსებასთან დაკავშირებით. როგორც ორგანიზაციაში აღნიშნავენ, ამ მიმართულებით უფრო ხელშესახები პროგრესია, თუმცა არ არის ცნობილი, თუ როდის მოხდება ADB-ის მმართველი საბჭოს მიერ აღნიშნული კრედიტის დამტკიცება.
ამჟამად, ანაკლიაში უკვე მიმდინარეობს ინფრასტრუქტურული სამუშაოები წყლის ფსკერის დარღმავების, ნაპირის მოწყობის, პორტის დამცავი ტალღმტეხელის მოწყობის მიმართულებით, რასაც $150 მილიონი დოლარის ღირებულების კონტრაქტით ბელგიური კომპანია Jan De Nul-ი ასრულებს.