Shell-ის ქიმიური აქტივების შესყიდვით ExxonMobil-ი და LyondellBasell-ი დაინტერესდნენ

ბრიტანულმა ენერგოგიგანტმა Shell-მა აშშ-ში მდებარე ქიმიური აქტივების გაყიდვის პროცესში პოტენციური ინვესტორებისგან ინტერესი უკვე მიიღო.

Financial Times-ის ცნობით, აქტივებით დაინტერესებულ მხარეთა შორის ამერიკული ნავთობკომპანია ExxonMobil-ი და ქიმიური მრეწველობის გიგანტი LyondellBasell-ი არიან. სავარაუდო გარიგების ჯამურმა ღირებულებამ შესაძლოა $8 მილიარდს მიაღწიოს, რაც კომპანიის მიერ ამ ობიექტებში განხორციელებულ ინვესტიციებთან შედარებით საგრძნობლად შემცირებული თანხაა.

არსებული ინფორმაციით, აქტივების შესყიდვის სურვილი კერძო საინვესტიციო კომპანია Apollo Global Management-მა და ქუვეითის სახელმწიფო ნავთობკორპორაციის ქიმიურმა ფრთამაც გამოხატეს. პოტენციურმა მყიდველებმა არასავალდებულო წინადადებები გასულ თვეში წარადგინეს. განაცხადები როგორც მთლიანი ბიზნესის, ისე მისი ცალკეული ნაწილების გამოსყიდვას მოიცავს.

Shell-ის ამერიკული ქიმიური ბიზნესი ლუიზიანას, ტეხასისა და პენსილვანიის შტატებში მდებარე ოთხ საწარმოო ობიექტს მოიცავს. აღნიშნულ ქარხნებში პლასტმასის, სარეცხი საშუალებებისა და ფარმაცევტული პროდუქციის შესაქმნელად საჭირო ქიმიკატები იწარმოება.

დაბალი მოგებიანობის მქონე ობიექტების გასხვისების გადაწყვეტილება კომპანიის მიერ კაპიტალის ოპტიმიზაციისა და რესურსების უფრო სარფიან სექტორებზე გადანაწილების სტრატეგიას უკავშირდება.