ანკარაში საქართველოს საელჩოს რეკონსტრუქციისთვის 529,611 ევროს გამარტივებული შესყიდვა გამოცხადდა

თურქეთში საქართველოს საელჩო ანკარაში მდებარე საელჩოსა შენობის, ასევე საელჩოს ეზოს ტერიტორიის რეკონსტრუქციისა და სარემონტო სამუშაოებისთვის 529,611 ევროს ღირებულების გამარტივებულ შესყიდვას გეგმავს - ამის შესახებ სახელმწიფო შესყიდვების სააგენტოს ვებგვერდზე წარდგენილი განცხადებიდან ირკვევა.

დოკუმენტაციის მიხედვით, სამუშაოები მოიცავს როგორც საელჩოს, ისე რეზიდენციის შიდა და გარე ინფრასტრუქტურის განახლებას. მათ შორისაა გათბობა-გაგრილების სისტემის მთავარი დანადგარებისა და მილების შეცვლა და გაწმენდა, განათების სისტემის განახლება, ფასადის შეკეთება, ეზოსა და გარე პერიმეტრის რეაბილიტაცია, დაზიანებული ფილების შეცვლა, პოლიკარბონატის კონსტრუქციების დემონტაჟი და ახლის მონტაჟი.

შიდა სამუშაოების ფარგლებში დაგეგმილია კედლებისა და ჭერის შეკეთება და შეღებვა, მარმარილოს იატაკის გაპრიალება, შპალერის გამოცვლა, კარებებისა და სანტექნიკის განახლება, კერამიკული ფილების შეცვლა და სხვა სარემონტო სამუშაოები.

საგარეო საქმეთა სამინისტროს შუამდგომლობის მიხედვით, ანკარაში მდებარე საელჩოსა და რეზიდენციის შენობები საქართველოს სახელმწიფოს საკუთრებაში 2006 წელს გადავიდა და ამ პერიოდის განმავლობაში შენობებში სრულმასშტაბიანი სარემონტო სამუშაოები პრაქტიკულად არ ჩატარებულა.

დოკუმენტაციაში აღნიშნულია, რომ არსებული გათბობა-გაგრილების სისტემა მნიშვნელოვნად გაუმართავია, მილებიდან წყლის ჟონვა კი კედლების დაზიანებას იწვევს. ასევე დაზიანებულია ფასადის ბათქაში და გარე სივრცეში არსებული გრანიტის ფილები, ხოლო რეზიდენციის შიდა სივრცეში დაფიქსირებულია ნესტი, დაზიანებული შპალერი და გაუმართავი სველი წერტილები.

შესყიდვის დასაბუთებაში ხაზგასმულია, რომ თურქეთი საქართველოს სტრატეგიული პარტნიორია და ანკარაში მდებარე საელჩო აქტიურად მასპინძლობს მაღალი დონის შეხვედრებს, კულტურულ და საგანმანათლებლო ღონისძიებებს, ასევე სამთავრობო დელეგაციებს, რისი გათვალისწინებითაც მნიშვნელოვანია რომ შენობის იერსახეს რენოვაცია ჩაუტარდეს.

საგარეო საქმეთა სამინისტრო განმარტავს, რომ სამუშაოების დროულად განხორციელება აუცილებელია, რადგან თურქეთში ინფლაციის ზრდა სამშენებლო მასალებისა და მომსახურების გაძვირებას იწვევს. უწყების ინფორმაციით, 2026 წლის იანვარ-აპრილის პერიოდში თურქეთში ინფლაციამ 33% შეადგინა, რის გამოც პროექტის ღირებულება უახლოეს პერიოდში შესაძლოა დამატებით 20-30%-ით გაიზარდოს.

დოკუმენტაციის თანახმად, სარემონტო სამუშაოების დაწყება 2026 წლის 20 ივნისიდან იგეგმება და მათი დასრულების სავარაუდო ვადა 6 თვეა.