Apple-ის მომწოდებელი კომპანია ჰონგ-კონგში წლის უმსხვილეს IPO-ს გეგმავს

ჩინური კომპანია Luxshare Precision Industry, რომელიც Apple-ის iPhone-ებისა და AirPods-ების აწყობას უზრუნველყოფს, გლობალურ ბაზარზე აქციების საჯარო განთავსებას იწყებს.

როგორც ირკვევა, კომპანია 383.5 მილიონი აქციის გაყიდვას გეგმავს, თითოეულის მაქსიმალური ფასი კი 63.28 ჰონგკონგურ დოლარს შეადგენს. გარიგების შედეგად Luxshare-მა შესაძლოა $3.1 მილიარდი მოიზიდოს, რაც მიმდინარე წელს ჰონგ-კონგის საფონდო ბირჟაზე ყველაზე მასშტაბური IPO-ს მაჩვენებელი იქნება.

არსებული ინფორმაციით, შეთავაზებული აქციების 90%-ს საერთაშორისო ინვესტორები მიიღებენ, ხოლო დარჩენილი წილი ჰონგ-კონგელ საცალო მყიდველებზე განაწილდება.

მნიშვნელოვანია ითქვას, რომ გასულ წელს კომპანიის შემოსავალი 24%-ით გაიზარდა და $48.9 მილიარდი შეადგინა. მიუხედავად იმისა, რომ 2025 წელს შემოსავლების თითქმის 80% სამომხმარებლო ელექტრონიკაზე მოდიოდა, კომპანია აქტიურად შედის ახალ სეგმენტებში. მისი საავტომობილო ელექტრონიკის განყოფილება სწრაფად იზრდება და გაყიდვების 11.8%-ს შეადგენს, მაშინ როდესაც ორი წლის წინ ეს მაჩვენებელი მხოლოდ 3.9% იყო. ამასთან, კომპანია საკომუნიკაციო ინფრასტრუქტურისა და მონაცემთა ცენტრებისთვის განკუთვნილ კომპონენტებსაც აწარმოებს.

რაც შეეხება მოზიდული სახსრების განკარგვას, ბირჟიდან მიღებული თანხა საავტომობილო და სამომხმარებლო ელექტრონიკის საწარმოო სიმძლავრეების გაფართოებას, კვლევებს, ინვესტიციებს, საბანკო ვალების დაფარვასა და მიმდინარე საოპერაციო ხარჯებს მოხმარდება.