რუმინეთის პრეზიდენტის ადმინისტრაციაში დეზინფორმაცია უწოდეს გავრცელებულ ინფორმაციას იმის შესახებ, თითქოს რუმინეთი უკრაინაში საკუთარი სამხედროების გაგზავნას გეგმავს საბრძოლო მოქმედებებში მონაწილეობის მისაღებად
რუმინეთის პრეზიდენტის ადმინისტრაციაში დეზინფორმაცია უწოდეს გავრცელებულ ინფორმაციას იმის შესახებ, თითქოს რუმინეთი უკრაინაში საკუთარი სამხედროების გაგზავნას გეგმავს საბრძოლო მოქმედებებში მონაწილეობის მისაღებად.
რუმინეთის პრეზიდენტის ადმინისტრაციაში განმარტეს, რომ ნიკუშორ დანმა პარლამენტს შეთანხმებისთვის გადაუგზავნა მოთხოვნა 20-მდე რუმინელი სამხედრო მოსამსახურის ჩართვის შესახებ უკრაინის მხარდაჭერის მრავალეროვნული ჯგუფის ოპერატიულ სარდლობაში, რომელიც საფრანგეთისა და დიდი ბრიტანეთის ტერიტორიაზე მოქმედებს, და ამას არანაირი კავშირი არ აქვს საბრძოლო მოქმედებებში მონაწილეობასთან.
„ბოლო დღეებში ქსელში ვრცელდება ყალბი ნარატივი იმის შესახებ, თითქოს რუმინეთი უკრაინაში სამხედროების გაგზავნას გეგმავს ომში მონაწილეობის მისაღებად. ეს არის დაშინებაზე დამყარებული მანიპულაცია, რომელიც განზრახ ამახინჯებს გადაწყვეტილების არსს, რათა გავრცელდეს უსაფუძვლო მტკიცებები კონფლიქტში რუმინეთის ჩათრევის შესახებ“, - განაცხადეს პრეზიდენტის ადმინისტრაციაში.
ასევე, განცხადებაში ხაზგასმით აღნიშნეს, რომ რუსეთის მიმდინარე ომი უკრაინის წინააღმდეგ გავლენას ახდენს ყველა მეზობელი სახელმწიფოს, მათ შორის რუმინეთის უსაფრთხოების სიტუაციაზე.
„რუმინეთის მთავარი პრიორიტეტი ჩვენი მოქალაქეების დაცვაა. სწორედ ამიტომ მონაწილეობს ჩვენი სახელმწიფო ყველა საერთაშორისო ფორმატში, რომელიც ამის უზრუნველყოფას უწყობს ხელს“, - ნათქვამია განცხადებაში.
იმედი
წყარო: imedinews.ge