Apple მომხმარებლებს iPhone-ების "ლიზინგს" თვეში 17.99 დოლარად სთავაზობს
Apple-ის მომხმარებლებს მალე შეეძლებათ, iPhone ლიზინგით, ორ წლამდე ვადით, თვეში 17.99 დოლარიდან აიღონ - ამის შესახებ კომპანიამ 28 ივლისს განაცხადა.
პროგრამა სახელწოდებით Upgrade ფინანსურ ტექნოლოგიურ კომპანია Klarna-სთან პარტნიორობით ხორციელდება, რომელიც მომხმარებლებს სთავაზობს სერვისს "იყიდე ახლა, გადაიხადე მოგვიანებით". სერვისი ხელმისაწვდომი იქნება როგორც Apple-ის ოფიციალურ ფიზიკურ მაღაზიებში, ისე ონლაინ პლატფორმაზე. საკრედიტო ისტორიის გამარტივებული შემოწმების შემდეგ, მომხმარებელს შესთავაზებენ iPhone-ის ერთ ან ორწლიან იჯარას. მსგავსი პირობები გავრცელდება Apple Watch-ზეც, ხოლო Mac-ისა და iPad-ისთვის ხელმისაწვდომი იქნება ორ ან სამწლიანი ლიზინგი.
ეს გადაწყვეტილება მოჰყვა ერთი თვის წინ Apple-ის მიერ მეხსიერების ჩიპების გლობალური დეფიციტის გამო iPad-ისა და Mac-ის საწყისი ფასების მინიმუმ 100 დოლარით გაზრდას. ანალიტიკოსები წელს iPhone-ის ფასების მატებასაც პროგნოზირებენ და აღნიშნავენ, რომ ლიზინგის პროგრამა Apple-ს საშუალებას მისცემს, მომხმარებლის ყურადღება მაღალი საწყისი ფასიდან შედარებით დაბალ ყოველთვიურ გადასახადზე გადაიტანოს.
Apple სმარტფონების განვადებით რეალიზაციისთვის ახალ გზებს ეძებს. ინვესტორები დიდი ხანია მიიჩნევენ, რომ ეს სტრატეგია კომპანიას ბიზნესის სეზონურობის დაბალანსებაში დაეხმარება და შეამცირებს მის დამოკიდებულებას ახალი ფლაგმანური მოდელების გაყიდვების ციკლებზე.
ვინაიდან ეს არის ლიზინგი, მომხმარებელს მოწყობილობის დაბრუნება 24 თვის შემდეგ მოუწევს. ამასთან, მომხმარებლებს დამატებითი საფასურის გადახდით სმარტფონის გამოსყიდვა ან ახალ მოდელზე გადასვლა შეეძლებათ.
მიუხედავად იმისა, რომ Klarna გადახდებზე ვადაგადაცილებისთვის ჯარიმებს არ დააწესებს, გადახდის ზედიზედ სამი თვის გამოტოვების შემთხვევაში ის მომხმარებელთან ხელშეკრულებას შეწყვეტს.
ფასები მნიშვნელოვნად განსხვავდება მოდელების მიხედვით და პრემიუმ კლასის მოწყობილობებისთვის მომხმარებლებს მეტის გადახდა მოუწევთ. მაგალითად, iPhone 17 Pro-ს იჯარა ორწლიანი ვადით თვეში 31.99 დოლარი ეღირება, ხოლო ერთწლიანი ვადით - 45.99 დოლარი. პროგრამაში არ შედის კომპანიის ზოგიერთი საბაზისო მოდელი, როგორებიცაა iPhone 16 და MacBook Neo.