არგენტინამ საგარეო ვალის დასაფარად "ოქროს პასპორტის" პროგრამა შეიმუშავა

არგენტინის ლიდერის, ხავიერ მილეის მთავრობამ ინვესტორებისთვის მოქალაქეობის მინიჭების ახალი ინიციატივა შეიმუშავა. როგორც ირკვევა, მდიდარი უცხოელები ქვეყნის პასპორტს $500,000-ის შემოწირულების სანაცვლოდ მიიღებენ.

ალტერნატიულ ვარიანტად კი $1 მილიონის ღირებულების ნულოვანი კუპონის მქონე სუვერენული ობლიგაციების შეძენა განიხილება. არსებული ინფორმაციით, ახალი სამთავრობო პროგრამა მიზნად მრავალმილიარდიანი სახელმწიფო ვალდებულებების დაფარვას ისახავს.

აღსანიშნავია, რომ ეს შეთავაზება "ოქროს ვიზის" პოტენციურ მფლობელებს 170 ქვეყანაში უვიზოდ მიმოსვლის უფლებასაც მისცემს. საყურადღებოა, რომ პროგრამა ინვესტორებისგან არგენტინაში ცხოვრებას არ მოითხოვს, რაც მათ საგადასახადო ტვირთს შეუმცირებს.

საკონსულტაციო კომპანიების განცხადებით, მილეის მიერ შემუშავებული გეგმით ძირითადად ამერიკელი და ევროპელი კლიენტები დაინტერესდებიან. ანალიტიკოსები აღნიშნავენ, რომ ახალი არგენტინული ინიციატივა ბაზარზე არსებულ სხვა ალტერნატივებზე ბევრად იაფი, მოსახერხებელი და ხელმისაწვდომია.