არგენტინის ფეხბურთის ასოციაცია აცხადებს, რომ აშშ-ს მათი პრეზიდენტი არ დაუკავებია

არგენტინის ფეხბურთის ასოციაციამ დაადასტურა, რომ აშშ-ში მიმდინარეობს გამოძიება მესამე პირის მიმართ, რომელსაც ასოციაციასთან კავშირი აქვს.

ორგანიზაციამ განცხადება მას შემდეგ გაავრცელა, რაც მედიაში გავრცელდა ინფორმაცია, თითქოს AFA-ს პრეზიდენტი კლაუდიო ტაპია და ხაზინადარი პაბლო ტოვიჯინო ნიუ-იორკის ჯონ კენედის საერთაშორისო აეროპორტში დააკავეს, სანამ ესპანეთთან მსოფლიო ჩემპიონატის ფინალში დამარცხების შემდეგ არგენტინის ნაკრების სამშობლოში მიმავალ რეისზე ავიდოდნენ.

მედიის ცნობით, ორივე მათგანი დაკითხვაზე დააკავეს, აშშ-ის ხელისუფლებამ ჩამოართვა ელექტრონული მოწყობილობები და სასამართლოში გამოცხადება მოსთხოვა, რაც AFA-ს საერთაშორისო კონტრაქტებთან დაკავშირებულ საქმეს ეხებოდა.

თუმცა, AFA-მ ოფიციალურ განცხადებაში ამ ინფორმაციას „სრულიად მცდარი“ უწოდა.„ეს ყველაფერი სიცრუეა,“ - განუცხადა AFP-ს ასოციაციის ერთ-ერთმა წარმომადგენელმა, ხოლო FBI-მ ამ საკითხზე კომენტარის გაკეთებაზე უარი განაცხადა.ამასთან, AFA-მ აღიარა, რომ ფლორიდის საოლქო სასამართლომ მართლაც გასცა უწყება, თუმცა ის „მესამე პირს“ ეხება.

ასოციაციის განცხადებით, აღნიშნულ პირს დიდი ნაფიც მსაჯულთა ჟიურის წინაშე გამოცხადება და იმ დოკუმენტებისა და კომუნიკაციების წარდგენა ევალება, რომლებიც შესაძლოა სხვადასხვა პირთან, მათ შორის ფეხბურთის ასოციაციის ოფიციალურ წარმომადგენლებთან იყოს დაკავშირებული.

2017 წლიდან კლაუდიო ტაპიას ხელმძღვანელობით მოქმედი არგენტინის ფეხბურთის ასოციაცია თავადაც რამდენიმე გამოძიების ობიექტია არგენტინაში.

ერთ-ერთი გამოძიება სავარაუდო ფულის გათეთრებას ეხება, ხოლო მეორე გადასახადებისგან თავის არიდებას.ყოფილი პროფკავშირის ლიდერის, კლაუდიო ტაპიას ხელმძღვანელობის პერიოდში AFA-ს ურთიერთობა ულტრამემარჯვენე პრეზიდენტ ხავიერ მილეის ადმინისტრაციასთან მნიშვნელოვნად დაიძაბა.მაგალითად, ტაპია კატეგორიულად ეწინააღმდეგება მილეის სურვილს, ქვეყნის საფეხბურთო კლუბები კერძო საკუთრებაში გადავიდეს.