აშშ-ის მხარდაჭერით, მამისონის უღელტეხილზე ახალი სასაზღვრო შენობა გაიხსნა

ამერიკის შეერთებული შტატების მხარდაჭერით, შინაგან საქმეთა მინისტრმა სულხან თამაზაშვილმა სასაზღვრო პოლიციის სახმელეთო საზღვრის დაცვის დეპარტამენტის ჯავა-ონის სამმართველოს სასაზღვრო სექტორის „მამისონის“ ახალი შენობა გახსნა.

ახალი სასაზღვრო სექტორი ზღვის დონიდან 1 800 მეტრის სიმაღლეზე მდებარეობს. შენობა თანამედროვე ინვენტარითა და უახლესი ტექნიკით აღიჭურვა. მისი ინფრასტრუქტურა ადგილობრივი რთული კლიმატური პირობების გათვალისწინებით მოეწყო, რაც მესაზღვრეებს სამსახურებრივი მოვალეობის ეფექტიანად შესრულებისა და ყოველდღიური საქმიანობისთვის სათანადო პირობებს უქმნის.

პროექტი აშშ-ის ევროპის სარდლობის (EUCOM), საქართველოში ამერიკის შეერთებული შტატების საელჩოს ნარკოტიკების წინააღმდეგ ბრძოლის ადმინისტრაციისა (DEA) და რეგიონალური უსაფრთხოების ოფისის (RSO) მხარდაჭერით განხორციელდა.

ღონისძიებას საქართველოში ამერიკის შეერთებული შტატების ელჩის მოვალეობის შემსრულებელი კორტნი ოსტრიანი, შინაგან საქმეთა მინისტრის მოადგილე გაგა კირკიტაძე, სასაზღვრო პოლიციის უფროსი დავით თამაზაშვილი და სამინისტროს სხვა ხელმძღვანელი პირები ესწრებოდნენ.