აშშ-ის სავაჭრო წარმომადგენელი ინდოეთთან სავაჭრო შეთანხმება მალე გაფორმებას გამორიცხავს
დონალდ ტრამპსა და ნარენდრა მოდის შორის გამართული სატელეფონო საუბრის შემდეგ, აშშ-ის სავაჭრო წარმომადგენელმა ჯემისონ გრირმა ინდოეთთან შეთანხმების უახლოეს პერიოდში მიღწევა გამორიცხა.
როგორც ირკვევა, მხარეებმა პრობლემური საკითხები გამოკვეთეს, თუმცა მოლაპარაკებების წარმატებით დასრულება ვერ შეძლეს. შესაბამისად, დარჩა მნიშვნელოვანი უთანხმოებები, რაზედაც მათ საუბრის გაგრძელება მოუწევთ.
თავად ინდოეთის პრემიერ-მინისტრმა აშშ-ის პრეზიდენტთან დიალოგი შედეგიანად შეაფასა, ოფიციალურმა ვაშინგტონმა კი საუბრის დეტალები არ გაასაჯაროვა.
პარალელურად, ინდოეთის ვაჭრობისა და მრეწველობის მინისტრმა პიუშ გოიალმა მოლაპარაკებების მიმართ ოპტიმიზმი გამოხატა. მისი განცხადებით, მილუოკიში ჯემისონ გრირთან გამართული შეხვედრა შუალედური დოკუმენტის დროულად მომზადების კუთხით წინ გადადგმული ნაბიჯი იყო.
მნიშვნელოვანია ითქვას, რომ მოლაპარაკებების მთავარ დაბრკოლებად ინდოეთის მიერ რუსული ნავთობის შესყიდვა რჩება. ვაშინგტონის შეფასებით, მოსკოვისგან ნედლეულის შეძენა უკრაინის ომის დაფინანსებას ემსახურება, რაც თეთრი სახლისთვის მიუღებელია.
თავის მხრივ, ოფიციალური ნიუ-დელი საკუთარი ენერგოუსაფრთხოების დაცვის საჭიროებაზე ამახვილებს ყურადღებას. ხელისუფლებაში განმარტავენ, რომ ირანში მიმდინარე ომმა ნავთობის გლობალური მიწოდება შეაფერხა, უალტერნატივოდ ყოფნის პირობებში კი რუსულ საწვავზე უარი არახელსაყრელი იქნება.
ცნობისთვის, ვაშინგტონმა რუსული ნავთობის შესყიდვის გამო ინდოეთს გასულ აგვისტოს 25%-იანი სადამსჯელო ტარიფი დაუწესა, თებერვალში კი გადასახადი 18%-მდე შეამცირა. ამჟამად ინდურ ექსპორტზე 10%-იანი განაკვეთი მოქმედებს.
BM.GE
წყარო: bm.ge