აშშ-ის წარმომადგენელთა პალატამ ირანში ტრამპის სამხედრო უფლებამოსილებები შეზღუდა
აშშ-ის წარმომადგენელთა პალატამ მხარი დაუჭირა დონალდ ტრამპის სამხედრო უფლებამოსილებების შემზღუდველ რეზოლუციას, რომელიც ირანთან არსებულ კონფლიქტს ეხება. არსებული ინფორმაციით, კენჭისყრისას ხმები შემდეგნაირად გადანაწილდა - 215 მომხრე და 208 წინააღმდეგი. საყურადღებო ფაქტია, რომ დასახელებულ ინიციატივას მხარი ოთხმა რესპუბლიკელმა კონგრესმენმაც დაუჭირა. ისინი ამ ნაბიჯით საკუთარი პარტიის პოზიციის წინააღმდეგ წავიდნენ. ცნობისთვის, საკანონმდებლო ინიციატივა წარმომადგენელთა პალატის საგარეო საქმეთა კომიტეტის წამყვანმა წევრმა, დემოკრატმა გრეგორი მიქსმა წარადგინა.
კენჭისყრა თავდაპირველად 21 მაისს უნდა გამართულიყო, თუმცა რესპუბლიკელმა ლიდერებმა პროცესი მოულოდნელად გააუქმეს. გრეგორი მიქსის განცხადებით, პალატის სპიკერი მაიკ ჯონსონი პრეზიდენტის გადასარჩენად დროს განზრახ აჭიანურებდა.
კონგრესმენი აღნიშნავს იმასაც, რომ მისი ბევრი რესპუბლიკელი კოლეგა საკუთარ ოლქებში ამომრჩევლების მხრიდან სურსათსა და საწვავზე გაზრდილი ფასების გამო დიდ ზეწოლას განიცდის. შესაბამისად, არაფერია გასაკვირი იმაში, რომ ეტაპობრივად მის ინიციატივას მხარი მეტმა რესპუბლიკელებმა დაუჭირა.
რაც შეეხება თავად რესპუბლიკურ პარტიას, წარმომადგენელთა პალატაში მისმა ლიდერმა მაიკ ჯონსონმა აღნიშნა, რომ ეს ინიციატივა სენატმა არცერთ შემთხვევაში არ უნდა მიიღოს, რადგან ეს პრეზიდენტ ტრამპს ქვეყნის პოზიციების დაცვას გაურთულებს.
სპიკერმა ტელეკომპანია CNN-თან ინტერვიუში ადმინისტრაციისთვის მოლაპარაკებების წარმოების უფლების ჩამორთმევა სახიფათო პრეცედენტად შეაფასა. ჯონსონის განცხადებით, ეს ნაბიჯი ქვეყნის პოზიციებსა და სამშვიდობო მოლაპარაკებების პროცესში მის ბერკეტებს მნიშვნელოვნად შეასუსტებს. მისი მტკიცებით, სამხედრო ოპერაცია „Epic Fury“ უკვე დასრულდა და აშშ-მა ირანში ყველა დასახული მიზანი ისედაც სრულად შეასრულა.
ცნობისთვის, წარმომადგენელთა პალატის მიერ მიღებული ერთობლივი რეზოლუცია კონგრესის ორივე პალატამ უნდა დაამტკიცოს. ეს დოკუმენტი პრეზიდენტს ხელმოსაწერად არ გადაეცემა.
BM.GE
წყარო: bm.ge